Albulena Haxhiu shtron bashkëpunimin me Rrjetin e Grave: Theks te barazia gjinore dhe ligjet parlamentare

Kryetarja e Kuvendit të Kosovës, Albulena Haxhiu, ka zhvilluar një takim me delegacionin e përfaqësueseve të Rrjetit të Grave të Kosovës, ku në qendër të vëmendjes kanë qenë hapat e mëtejmë drejt fuqizimit të të drejtave të grave dhe konsolidimit të barazisë gjinore në vend. Përmes një publikimi në rrjetet sociale, Haxhiu ka bërë të me dije se gjatë këtij bashkëbisedimi janë trajtuar prioritetet e agjendës gjinore në Kuvend, rëndësia e integrimit të perspektivës gjinore në procesin e ligjbërjes, si dhe domosdoshmëria e ngritjes së kapaciteteve mbikëqyrëse të institucionit ligjvënës për jetësimin e tyre në praktikë. Ndër të tjera, ajo ka theksuar gatishmërinë e saj institucionale që përgjatë kësaj legjislature ky vizion të shtyhet fuqishëm përpara, në bashkërendim të ngushtë me shoqërinë civile dhe organizatat që mbrojnë të drejtat e grave, me synim që barazia gjinore të integrohet plotësisht në çdo proces vendimmarrës të Kuvendit. "Ishte kënaqësi t’i mirëprisja sot përfaqësueset e Rrjetit të Grave të Kosovës, gra me të cilat ndajmë një përkushtim të gjatë për barazinë gjinore dhe avancimin e të drejtave të grave", ka shkruar ndër të tjera ajo. Gjatë takimit, ajo ka shtuar: "Biseduam për përparësitë e agjendës gjinore parlamentare, hartimin e ligjeve nga perspektiva gjinore dhe fuqizimin e rolit mbikëqyrës të Kuvendit në zbatimin e tyre". Po ashtu, Haxhiu ka pohuar: "Shpreha vullnetin dhe përkushtimin tim që gjatë kësaj legjislature ta çojmë më tej këtë agjendë, në bashkëpunim të ngushtë me organizatat e grave, duke u siguruar që barazia gjinore të zërë vendin që i takon në punën dhe vendimmarrjen e Kuvendit". Në fund, kreu i Kuvendit ka vlerësuar lart kontributin e deritanishëm: "E çmoj veçanërisht punën shumëvjeçare të Rrjetit dhe të 106 organizatave anëtare, si dhe këmbënguljen e tyre për t'i kthyer të drejtat e garantuara me ligj në të drejta që gëzohen në jetën e përditshme".