Në kërkim të talenteve të reja, trajneri i Kombëtares Maran inspekton nga afër sfidat e javës

Tekniku i Kombëtares shqiptare, Rolando Maran, ka intensifikuar aksionin e tij vëzhgues në kuadër të kampionatit vendor “Abissnet Superiore”, duke ndjekur nga afër zhvillimin e ndeshjeve më të rëndësishme të javës së nëntë. I mbështetur nga bashkëpunëtorët e tij në stafin teknik, Christian Maraner dhe Ervin Bulku, numri një i stafit kuqezi ishte i pranishëm në shkallët e stadiumit për të ndjekur hapjen e kësaj jave mes Vorës dhe Vllaznisë të mërkurën. Më pas, turi i tij vëzhgues u zhvendos të enjten në stadiumin “Niko Dovana” të Durrësit për derbin kryeqytetas Tirana-Dinamo, ndërsa epilogu i këtij itinerari u shënua me sfidën Egnatia-Teuta, e cila u zhvillua pasditen e djeshme në “Egnatia Arena” të Rrogozhinës. Ky angazhim i vazhdueshëm përmbush premtimin e dhënë nga vetë trajneri që prej firmosjes së marrëveshjes me Federatën Shqiptare të Futbollit në muajin maj. Maran mbetet i përkushtuar në terren për të skanuar formën e futbollistëve aktualë dhe për të zbuluar elementë të rinj që mund t'i shërbejnë përfaqësuesores në të ardhmen. Krahas pranisë në takimet zyrtare, strategu italian ka zhvilluar më herët edhe vizita pranë mjediseve stërvitore të disa skuadrave të elitës. Këto takime i kanë dhënë atij mundësinë të njihet nga afër me metodologjitë e punës në klube dhe të bashkëbisedojë drejtpërdrejt me trajnerët e ekipeve vendase.