Bashkëpunim global kundër korrupsionit: SPAK mbledh në Tiranë dhjetëra prokurorë dhe hetues ndërkombëtarë

Prokuroria e Posaçme (SPAK) ka qenë nikoqire e edicionit të 16-të të takimit të Rrjetit të Organeve Ligjzbatuese (LEN), i cili funksionon në kuadër të Rrjetit Kundër Korrupsionit të OECD-së për rajonin e Europës Lindore dhe Azisë Qendrore (ACN). Gjatë datave 27–29 tetor, kryeqyteti shqiptar u bë pikëtakimi i 70 prokurorëve dhe hetuesve nga 28 juridiksione të ndryshme, si dhe i deleguarve nga tre organizata të rëndësishme ndërkombëtare. Sipas njoftimit zyrtar, punimet e këtij samiti u fokusuan tek bashkëpunimi praktik në fushën e parandalimit dhe goditjes së korrupsionit. Pjesëmarrësit trajtuan çështje kyçe si menaxhimi i ligjshëm i të dhënave fillestare, sigurimi dhe administrimi i provave digjitale, si dhe procedurat për gjurmimin dhe konfiskimin e pasurive me origjinë të pajustifikuar. Në fokus të diskutimeve ishte edhe domosdoshmëria e harmonizimit të teknikave hetimore mes institucioneve të shteteve partnerë. SPAK ka vënë në dukje se në rastet kur hetimet, individët e përfshirë apo asetet financiare kapërcejnë kufijtë kombëtarë, ndërtimi i një sistemi të fortë provash kërkon një koordinim ndërkombëtar të pandërprerë. “Lufta kundër korrupsionit lidhet drejtpërdrejt me sigurinë e qytetarëve për të jetuar me dinjitet. Nga data 27 -29 tetor, SPAK organizoi takimin e 16-të të Rrjetit të Organeve Ligjzbatuese (LEN), pjesë e Rrjetit Kundër Korrupsionit të OECD-së për Europën Lindore dhe Azinë Qendrore (ACN). Në këtë takim morën pjesë 70 hetues dhe prokurorë nga 28 juridiksione, së bashku me përfaqësues të tre organizatave ndërkombëtare, për të shkëmbyer përvoja praktike mbi: • Përdorimin e ligjshëm të informacionit fillestar;• Ruajtjen e provave elektronike;• Vërtetimin e origjinës së paligjshme të pasurive;• Shkëmbimi i teknikave dhe zgjidhjeve në praktikë Kur informacioni, personat dhe pasuritë shtrihen në vende të ndryshme, krijimi i një zinxhiri provash kërkon bashkëpunim të ngushtë ndërkombëtar. Falënderojmë OECD-në dhe Rrjetin e saj Kundër Korrupsionit për bashkorganizimin e këtij takimi, si dhe Bashkimin Europian dhe Qeverinë e Mbretërisë së Bashkuar për mbështetjen e tyre”, bën të ditur institucioni i akuzës.