Lëvizje në krye të Policisë së Kosovës: Gazmend Hoxha largohet nga detyra, Fehmi Hoti merr drejtimin

Kryeministri i Republikës së Kosovës, Albin Kurti, ka pranuar sot kërkesën për dorëheqje të paraqitur nga Gazmend Hoxha, duke e liruar zyrtarisht atë nga pozita e Drejtorit të Përgjithshëm të Policisë së Kosovës. Sipas njoftimit zyrtar të ekzekutivit, duke u bazuar në legjislacionin në fuqi dhe pas propozimit të ardhur nga ministri i Punëve të Brendshme, Xhelal Sveçla, kreu i qeverisë ka emëruar Fehmi Hotin në cilësinë e ushtruesit të detyrës së Drejtorit të Përgjithshëm të Policisë. Në reagimin e saj, Qeveria e Kosovës ka shprehur vlerësimin për punën, kontributin dhe përkushtimin e treguar nga Gazmend Hoxha përgjatë gjithë kohës sa ka udhëhequr këtë institucion. Ky zhvillim vjen nën hijen e ngjarjes tragjike të vrasjes së Arlinda Zekajt, një rast që solli në pah dështime dhe lëshime të rënda në nivel institutional. Pavarësisht masave ndëshkimore që përfshinë suspendime pas këtij rasti, skena politike ende nuk ka prodhuar asnjë përgjegjësi morale apo dorëheqje zyrtare nga zyrtarët e lartë, ndërkohë që thirrjet e qytetarëve dhe protestuesve mbeten të fokusuara te kërkesa për largimin e ministrave Donika Gërvalla dhe Xhelal Sveçla.