Tragjedia me helikopterin e EUFOR-it, Kaja Kallas shpreh ngushëllime për viktimat

Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, ka reaguar me hidhërim të thellë pas lajmit për rrëzimin e helikopterit të misionit EUFOR Althea në afërsi të Brçkos, në Bosnjë e Hercegovinë, ngjarje e cila rezultoi me humbje jetësh. Nëpërmjet një komunikimi në platformën X, Kallas shprehu ngushëllimet e saj më të sinqerta për familjarët e viktimave dhe të gjithë personat e prekur nga ky aksident tragjik. Ajo vlerësoi lart angazhimin e përditshëm të stafit të EUFOR-it, të cilët punojnë pa u lodhur për të garantuar paqen dhe stabilitetin në Bosnjë e Hercegovinë. Shefja e diplomacisë evropiane njoftoi se u ka përcjellë ngushëllimet zyrtare ministrit të Jashtëm të Italisë, Antonio Tajani, si dhe ministrit të Mbrojtjes së këtij vendi, Guido Crosetto. “Evropa qëndron në solidaritet të plotë me Italinë në këtë kohë të vështirë”, ka deklaruar Kallas. Ajo bëri të ditur gjithashtu se institucionet e Bashkimit Evropian janë në koordinim të vazhdueshëm me komandën e EUFOR-it dhe përfaqësuesit e BE-së në terren për të ndjekur situatën nga afër.