Franca në alarm: Mobilizim masiv i 70 mijë policëve përballë kërcënimeve për trazira

Autoritetet franceze kanë ndezur alarmin e sigurisë për datën 31 tetor, duke e cilësuar si një ditë me rrezikshmëri të lartë për rendin publik. Ministri i Brendshëm, Laurent Nunez, ka konfirmuar angazhimin e 70,000 forcave të sigurisë në mbarë vendin, me qëllim parandalimin e çdo incidenti të mundshëm gjatë festimeve të Halloween-it. Sipas Nunez, vendimi vjen pas monitorimit të thirrjeve shqetësuese në rrjetet sociale, ku grupe radikale kanë shprehur hapur synimet për organizimin e protestave të dhunshme. Ministri ka paralajmëruar se forcat e rendit do të aplikojnë një strategji “jashtëzakonisht të rreptë” ndaj çdo lloj tentative për destabilizim, duke theksuar se rreziku do të jetë më i lartë gjatë orëve të mbrëmjes, pas përfundimit të tubimeve kryesore. Në deklaratën e tij, ministri vuri në dukje se thirrjet për mobilizim po vijnë nga segmente të ndryshme, duke përfshirë lëvizjet sindikale, krahun e majtë ekstrem, si dhe fraksione të radikalizuara të lëvizjes së “Jelekverdhëve”. Ai saktësoi se bëhet fjalë për mesazhe të ashpra që kërkojnë prani në rrugët publike duke filluar nga ora 20:00, duke e shndërruar 31 tetorin në një sfidë të vërtetë për sigurinë kombëtare. Kjo masë vjen pas një operacioni të ngjashëm të ndërmarrë javën e kaluar, kur 70,000 oficerë u angazhuan për të menaxhuar një turmë prej 410,000 protestuesish. Ky mobilizim rezultoi efektiv në parandalimin e akteve të vandalizmit dhe plaçkitjeve, të cilat kishin shkaktuar shqetësim të gjerë në disa qytete franceze më 17 tetor.