Daniel Dubois drejt mbrojtjes së titullit: Kush do të jetë kundërshtari i tij në ring?

Kampioni i botës në peshat e rënda sipas versionit WBO, Daniel Dubois, po përgatitet për një sfidë të rëndësishme në mbrojtje të titullit të tij. Sipas njoftimeve më të fundit, përballja e tij e radhës është planifikuar për datën 30 janar 2027, ku përballë pritet të jetë boksieri nga Zelanda e Re, Joseph Parker. Burime pranë revistës prestigjioze “The Ring” konfirmojnë se palët janë në proces negociatash intensive. Bisedimet po përqendrohen në përcaktimin e arenës së ndeshjes, me dy opsione kryesore në tavolinë: “O2 Arena” në Londër ose “Co-op Live” në Manchester. Megjithatë, një marrëveshje përfundimtare ende nuk është formalizuar mes palëve. Nëse ky duel merr dritën jeshile, atëherë boksieri kroat Filip Hrgoviq, kampion aktual i IBF-së, do të duhet të presë sërish për t'u hakmarrë ndaj Duboisit. Kujtojmë se Dubois mbetet i vetmi boksier që i ka shkaktuar humbjen e parë në karrierën profesioniste 34-vjeçarit kroat, në një përballje të zhvilluar gjatë vitit 2024. Për Joseph Parkerin, kjo rikthim në ring vjen pas një periudhe sfiduese. Në duelin e tij të fundit, të zhvilluar në tetor të vitit 2025, ai u mposht nga Fabio Wardley në raundin e 11-të. Pas atij meçi, Parker u përball me një pezullim nga Agjencia Britanike Kundër Dopingut, pasi në testet e tij u gjet një metabolit i kokainës. Boksieri pretendoi se kjo kishte ndodhur për shkak të pakujdesisë së nutricionistit të tij, ndërsa pezullimi tre-mujor që iu shqiptua ka përfunduar tashmë. Vlen të theksohet se përplasja mes Dubois dhe Parker ishte planifikuar fillimisht për shkurtin e vitit 2025, por u anulua për shkak të problemeve shëndetësore të britanikut. Në atë kohë, Parker u ndesh me Martin Bakolen, i cili u angazhua si zëvendësues për të mbushur boshllëkun e lënë nga Dubois.