Dosja e pasurisë: Çfarë zbulon deklarimi i Kryeprokurores së Pejës, Lumturije Vuçetaj

Kryetarja e Prokurorisë Themelore në Pejë, Lumturije Vuçetaj, ka dorëzuar pranë Agjencisë për Parandalimin e Korrupsionit raportin e rregullt vjetor të pasurisë për vitin 2026, ku ka bërë publike pronat e paluajtshme, automjetet dhe detyrimet financiare të familjes së saj. Sipas dokumentit zyrtar, Vuçetaj ka regjistruar gjithsej 12 pasuri të paluajtshme, të cilat përfshijnë tokë bujqësore, kullosa, shtëpi banimi, pyje, livadhe, truall dhe një pishinë, ku pjesa më e madhe e tyre figuron në emër të bashkëshortit. Pasuria me vlerën më të lartë monetare është një arë prej 4.001 metrash katrorë, e vlerësuar rreth 160 mijë euro, e cila është trashëguar në vitin 2019 nga gjyshja e bashkëshortit dhe mbahet në pronësi të tij me një të tretën e pjesëmarrjes. Gjithashtu, në emër të bashkëshortit është regjistruar një shtëpi prej 240 metrash katrorë, e ngritur në vitin 2001 përmes kursimeve familjare, me vlerë 140 mijë euro, si dhe një tokë prej 625 metrash katrorë e blerë në vitin 2009 për 15 mijë euro. Në kuadër të pasurive të trashëguara nga ana e familjes së bashkëshortit në vitin 2019, listës i shtohen disa sipërfaqe tokësore dhe pyjore, ku përfshihen kullosa prej 64.401 metrash katrorë me vlerë 64 mijë euro, një tjetër kullosë prej 1.126 metrash katrorë me vlerë 44 mijë euro, si dhe një kullosë prej 229 metrash katrorë e vlerësuar me 10 mijë euro. Po ashtu, bashkëshorti zotëron një kullosë tjetër prej 3.634 metrash katrorë në vlerë 36 mijë euro, një pyll prej 30.823 metrash katrorë me vlerë 31 mijë euro, si dhe një livadh prej 12.884 metrash katrorë që kap vlerën e 58 mijë eurove. Në të njëjtin bllok pasurish të trashëguara figurojnë edhe një kullosë me sipërfaqe 5.911 metra katrorë në vlerë 60 mijë euro, si dhe një truall prej 1.256 metrash katrorë me vlerë 54 mijë euro, ku përqindja e pronësisë ndryshon nga një e treta deri në 1/27 në varësi të pasurisë. Ndërkohë, në pronësi të përbashkët është deklaruar një pishinë me sipërfaqe 50 metra katrorë, e ndërtuar në vitin 2022 përmes një kredie bancare, vlera e së cilës llogaritet në 40 mijë euro. Sa i përket pasurive të luajtshme me vlerë që kalon shumën prej 3.000 eurosh, kryeprokurorja ka deklaruar një automjet të tipit Mercedes-Benz, të blerë në vitin 2011 nga kursimet personale, me vlerë 12.500 euro, i cili është në pronësi të saj. Në të njëjtin formular është pasqyruar edhe një veturë e markës BMW, e blerë në vitin 2019 përmes një financimi kredie me vlerë 8.000 euro, e cila figuron në pronësi të fëmijëve me të cilët ajo bashkëjeton. Lidhur me pjesën e letrave me vlerë, aksioneve në shoqëri tregtare apo kriptovalutave, në regjistër nuk është shënuar asnjë e dhënë. Në rubrikën e detyrimeve financiare, kryetarja e prokurorisë ka paraqitur huamarrjet e saj ndaj institucioneve bankare, duke përfshirë një kredi prej 30 mijë eurosh të marrë më 28 qershor 2022 në Bankën Kombëtare Tregtare për ndërtimin e pishinës, e cila kishte afat 36-mujor dhe tashmë rezulton e shlyer plotësisht me vlerë të mbetur zero euro. Po ashtu, në të njëjtën bankë ajo ka deklaruar një kredi prej 4.000 eurosh për qëllime personale, e marrë më 26 janar 2023, e cila ka mbetur me një detyrim prej 121.24 eurosh, si dhe një detyrim tjetër financiar të ngjashëm.