Kriza te Manchester United, Carrick: S’kam nevojë për garanci nga drejtuesit, jam i qetë për të ardhmen time

Strategu i Manchester United, Michael Carrick, ka deklaruar se nuk ndjehet i habitur që vijon të drejtojë skuadrën, pavarësisht serisë negative të rezultateve dhe valës së kritikave nga opinioni sportiv. Gjatë prononcimit të tij, ai ka nënvizuar se mbetet i përkushtuar plotësisht te detyra dhe se nuk ka kërkuar kurrfarë garancie verbale apo zyrtare nga krerët e klubit lidhur me pozitat e tij. Klubi nga Old Trafford po kalon një fazë tejet sfiduese, duke regjistruar plot tetë ndeshje radhazi pa shijuar fitoren. Përballja e humbur ndaj Bournemouth të dielën e kaluar e ka zbritur ekipin në vetëm një pikë larg zonës së rrezikut nga Premier League. Në dymbëdhjetë paraqitjet e këtij edicioni në të gjitha garat, “Djajtë e Kuq” numërojnë vetëm dy fitore. Ndërkohë, bilanci prej shtatë pikëve nga tetë sfidat e para në kampionat përbën statistikat më të zymta të klubit në këtë fazë të sezonit gjatë katër dekadave të fundit. Pavarësisht trysnisë së madhe dhe zërave për një shkarkim të mundshëm, Carrick ka bërë të ditur se është tejet i motivuar për ta kthyer situatën në favor të skuadrës. “Jam këtu për ta bërë më të mirën për ekipin. Dua me gjithë zemër që ta bëjmë skuadrën më të mirë dhe t’i përmirësojmë gjërat. Prandaj, nuk jam i befasuar që vazhdoj të jem në këtë detyrë”, u shpreh trajneri anglez gjatë konferencës për media të mbajtur të enjten. Ai ka shtuar gjithashtu se nuk ndjen nevojë për mbështetje publike apo konfirmime nga pronarët dhe drejtori i futbollit, Jason Wilcox. “Nuk kam nevojë për garanci nga askush. E kuptoj pozitën time, punën dhe përgjegjësinë që mban kjo detyrë”, shtoi ai. Lidhur me situatën e kapitenit Bruno Fernandes, i cili u la në stol në ndeshjen kundër Bournemouth pasi kishte shprehur pakënaqësi me skemat e trajnerit pas disfatës 4-1 kundër Comos, Carrick ka dalë në mbrojtje të mesfushorit portugez. Megjithatë, ai ka theksuar se nuk ka asnjë dyshim rreth angazhimit të Fernandes ndaj ngjyrave të klubit dhe se ai do të mbetet lider i skuadrës. “Bruno është ai që e ka udhëhequr ekipin shumë mirë në shumë ndeshje dhe për shumë vite. Ai do të vazhdojë ta bëjë këtë”, u shpreh ai. Tekniku sqaroi se vendimi për ta lënë në bankinë portugezin ndaj Bournemouth ishte thjesht një zgjedhje taktike për atë përballje. “Bruno është plotësisht i përkushtuar ndaj këtij klubi. Nuk kam asnjë problem me këtë dhe ne vazhdojmë përpara”, shtoi trajneri. Pas ndeshjes së fundit, Carrick u prit me duartrokitje nga një pjesë e tifozëve, ndërsa futbollistët u shoqëruan me vërshëllima teksa lëshonin fushën. Ndërkaq, ish-kapiteni i klubit, Gary Neville, deklaroi të enjten se ndonjëherë shkarkimi i një trajneri ndodh për mbrojtjen e vetë figurës së tij. Vlen të theksohet se Michael Carrick kishte firmosur një marrëveshje dyvjeçare në muajin maj, pasi si trajner i përkohshëm e dërgojë skuadrën në vendin e tretë në Premier League, duke e siguruar rikthimin në Champions League. Tani, fokusi i tij kryesor mbetet te rikthimi te suksesi. Provimi i radhës për Manchester United do të jetë këtë të shtunë, kur të udhëtojnë për t'u ballafaquar me Chelsean. “Djemtë janë të uritur për sukses. Na dhemb fakti që nuk kemi fituar mjaftueshëm ndeshje, por kemi dëshirë dhe vendosmëri për t’i përmirësuar gjërat”, përfundoi Carrick.