Tragjedi në Bosnjë: Rrëzohet helikopteri i EUFOR-it, humbin jetën katër ushtarakë italianë

Një ngjarje e rëndë ka tronditur ditën e sotme qytetin Gorice, pranë Bërçkos në Bosnjë dhe Hercegovinë, ku një helikopter ushtarak i misionit EUFOR është rrëzuar gjatë një fluturimi shërbimi. Si pasojë e këtij aksidenti tragjik, katër persona kanë ndërruar jetë, ndërsa 11 të tjerë kanë pësuar lëndime, ku të gjithë viktimat dhe të lënduarit janë shtetas italianë. Nëpërmjet një njoftimi zyrtar, misioni i EUFOR-it ka konfirmuar se fluturimi ishte pjesë e një operacioni rutinë në rajonin e Bërçkos. Autoritetet ushtarake kanë garantuar se gjatë incidentit nuk është shkaktuar asnjë dëm në pronat apo infrastrukturën civile, dhe fatmirësisht nuk ka pasur civilë të lënduar. Lidhur me shkaqet e katastrofës, është paralajmëruar një hetim i thelluar dhe gjithëpërfshirës, ndërsa detaje shtesë premtohet se do të publikohen sapo të zbardhen plotësisht të gjitha faktet nga terreni. Ndërkohë, Policia e Qarkut Bërçko ende nuk ka dalë me një komunikatë zyrtare për të sqaruar rrethanat specifike që çuan në këtë aksident ajror. Sipas informacioneve të bëra publike, bëhet fjalë për një helikopter transporti të modelit CH-47 Chinook që ishte përfshirë në këtë ngjarje të rëndë. Referuar të dhënave nga Ministria e Mbrojtjes e Italisë, detashmenti i Aviacionit të Ushtrisë Italiane nga regjimenti i 4-të "Altair" është pjesë e misionit EUFOR që nga janari i vitit 2026. Ky njësi operon me helikopterë shumëfunksionalë AB-205 dhe helikopterë të mesëm transporti CH-47F, të cilët përdoren për misione transporti, evakuime mjekësore dhe operacione nxjerrjeje.