Vrasja e Arlinda Zekajt në Pejë: Kryeministri Kurti merr raportet zyrtare, Gërvalla e Sveçla dalin nesër në konferencë

Ekzekutimi tragjik i Arlinda Zekajt, ngjarje kjo e shënuar të dielën në fshatin Vitomiricë të Pejës, ka marrë një kthesë institucionale pasi Qeveria e Kosovës ka konfirmuar se Zyra e Kryeministrit është pajisur me dokumentacionin e detajuar hetimor nga dikasteret përkatëse të drejtësisë dhe sigurisë. Në njoftimin zyrtar bëhet e ditur se materialet e dorëzuara nga Ministria e Drejtësisë dhe ajo e Punëve të Brendshme do të kalojnë në sitë nga ekzekutivi. Qëllimi është shqyrtimi rrënjësor i dinamikës së ngjarjes, identifikimi i çdo lëshimi të mundshëm, trajtimit të papërgjegjshëm, neglizhencës apo mungesës së reagimit institucional gjatë procedurave të deritanishme. “Zyra e Kryeministrit sapo pranoi raportet e hollësishme nga Ministria e Drejtësisë dhe ajo e Punëve të Brendshme në lidhje me rastin e Arlinda Zekajt. Së bashku me ministrat përkatës do të bëhet shqyrtimi dhe analizimi i tyre në detaje, për historinë dhe rrjedhën e rastit, për secilin lëshim e trajtim të papërgjegjshëm, për neglizhencë e mos reagim, si dhe gjithçka që lidhet me procedurën dhe përgjegjësinë institucionale”, theksohet në komunikatën e ekzekutivit. Për të bërë publike gjetjet dhe hapat e mëtejshëm që do të ndërmerren nga institucionet shtetërore, zëvendëskryeministrja, njëkohësisht ministre e Punëve të Jashtme dhe Diasporës, Donika Gërvalla, dhe ministri i Punëve të Brendshme, Xhelal Sveçla, do të paraqiten para mediave. Konferenca e jashtëzakonshme e dy zyrtarëve të lartë qeveritarë është caktuar të mbahet nesër, me fillim nga ora 09:00, në ambientet e Zyrës së Kryeministrit. Kujtojmë se ky krim i rëndë ka tronditur opinionin publik, duke ngritur valë të fuqishme reagimesh e pakënaqësish nga qytetarët dhe faktorët institucionalë në vend.