Ndryshon masa e sigurisë, Valon Lluka lë qelinë pas vendimit për dorëzani

Valon Lluka ka lënë paraburgimin, pasi Gjykata Themelore në Prishtinë ka pranuar zëvendësimin e kësaj mase të sigurisë me dorëzani. Lajmi është bërë i ditur nga avokati i tij mbrojtës, Driton Muharremi, përmes një njoftimi zyrtar për media. Sipas avokatit Muharremi, vendimi për lirimin e Llukës është marrë nga gjykatarja e procedurës paraprake brenda Gjykatës Themelore në Prishtinë. Mbrojtja ka theksuar se ky hap vjen në kuadër të procedurave ligjore të rregullta dhe shënon një ndryshim të masës kufizuese për të inkuadruarit në këtë çështje. Në deklaratën e tij, mbrojtësi i Llukës ka shprehur besimin e plotë se pafajësia e klientit të tij do të dalë në pah gjatë fazave të ardhshme të gjykimit. Muharremi ka shtuar se bashkë me Llukën do të provojnë mungesën e çdo lloj lidhjeje me akuzat penale që rëndojnë mbi të, duke besuar fuqimisht në parimin e prezumimit të pafajësisë dhe drejtësi të plotë.