Tensioni para Qeverisë: Protestuesit shkruajnë mesazhe në dyert e ekzekutivit dhe kërkojnë shkarkime

Pasi kanë nisur marshimin e tyre nga sheshi “Zahir Pajaziti” dhe janë ndaluar pranë Ministrisë së Drejtësisë dhe institucioneve të sistemit të drejtësisë e hetuesisë, protestuesit kanë arritur në shkallët e ndërtesës së Qeverisë së Kosovës. Sapo kanë dalë para objektit të ekzekutivit, pjesëmarrësit e protestës kanë shkruar fjalët “marre” dhe “drejtësi” mbi dyert e institucionit, duke shprehur kështu revoltën e tyre të hapur. Gjatë tubimit janë dëgjuar sërish thirrje të vazhdueshme për dorëheqje dhe shkarkime të zyrtarëve, lidhur me rastin tragjik të Arlinda Zekajt. Në shenjë pakënaqësie, para ndërtesës qeveritare është riprodhuar gjithashtu audio-biseda e zhvilluar mes viktimës Arlinda dhe togerit policor, Faruk Muqolli.