Kurti pas miratimit të Ligjit për Byronë: Pengesat mbi trevjeçare nuk mund ta ndalin drejtësinë

Kryeministri i Kosovës, Albin Kurti, ka përcjellë një reagim zyrtar pas miratimit përfundimtar në lexim të dytë të Ligjit për Byronë për Verifikimin dhe Konfiskimin e Pasurisë së Pajustifikueshme në Kuvendin e Kosovës. Kreu i ekzekutivit ka shprehur mirënjohjen e tij për deputetët që mbështetën këtë nismë ligjore me votën pro, ndërsa ka vënë në pah sfidat dhe pengesat përgjatë këtij rrugëtimi, duke përmendur se ky akt normativ ka përfunduar dy herë në shqyrtim para Gjykatës Kushtetuese, duke e zvarritur procesin për më shumë se tre vjet e gjysmë. Sipas shefit të Qeverisë, pavarësisht përpjekjeve për ta ngadalësuar këtë nismë, synimi për të vendosur rregull dhe për të garantuar se pasuria në Republikën e Kosovës buron nga të hyra të ligjshme dhe të ndershme mbetet i palëkundur, duke mos lejuar që vonesat e kaluara të ndalin këtë objektiv të shumëpritur.