Bllokimi i pronës publike alarmon bizneset, DHTIK kërkon ndërhyrje urgjente nga ekzekutivi

Dhoma e Tregtisë dhe Industrisë Kosovë (DHTIK) i ka bërë thirrje Qeverisë së Kosovës që të ndërhyjë pa humbur kohë për të hequr pengesat burokratike, të cilat, sipas saj, po paralizojnë investimet dhe aktivitetin e bizneseve në shfrytëzimin e pronave publike. Për t'i dhënë fund kësaj situate, DHTIK i është drejtuar zyrtarisht kryeministrit të vendit dhe ministrit të Bujqësisë, Pylltarisë dhe Zhvillimit Rural, duke kërkuar përshpejtimin e procedurave dhe ndryshime thelbësore në Ligjin për Pronën Publike. Në reagimin e saj, Dhoma shpreh shqetësimin e thellë për zvarritjet administrative, duke nënvizuar se këto ngecje po dëmtojnë rëndë ekonominë, po rrezikojnë vendet e punës, po zvogëlojnë hapësirën në treg dhe po minojnë sigurinë juridike të ndërmarrjeve. Sipas institucionit, pavarësisht se Qeveria e Kosovës u ka dhënë dritën jeshile tri kompanive që të shfrytëzojnë pronën publike, ato ende nuk e kanë nisur punën në terren. Shkak për këtë janë bërë kontratat e kushtëzuara nga Agjencia e Pyjeve të Kosovës, e cila kërkon që fillimisht të mbyllet procesi i ndërrimit të destinimit të tokës. DHTIK vlerëson se ky hap burokratik duhej të ishte mbyllur para lidhjes së kontratave, në mënyrë që fituesit e së drejtës për shfrytëzim të mos përballeshin me sfida të reja administrative pasi kanë siguruar pronën. Po ashtu, ky mosfinalizim ka lënë në harresë edhe procedurat për pajisjen me lejet e nevojshme nga Komisioni i Pavarur për Miniera dhe Minerale (KPMM). Një tjetër hallkë e dobët që thekson DHTIK është numri i madh i institucioneve të përfshira dhe natyra e ndërlikuar e procedurave. Si pasojë e kësaj burokracie të tejskajshme, një biznes mund të presë deri në një vit të plotë vetëm për të siguruar lejen e shfrytëzimit të pronës publike. “Janë me qindra kërkesa të deponuara prej kohësh në Agjencinë e Pyjeve të Kosovës, të cilat vazhdojnë të mos përcillen në Zyrën për Administrimin e Pronës Publike për trajtim të mëtejshëm”, bëhet e ditur në qëndrimin e DHTIK-së. Kjo situatë, sipas Dhomës, po reflektohet drejtpërdrejt edhe tek importi i zhavorrit. Duke u bazuar në shifrat e Doganës së Kosovës, DHTIK njofton se importi i këtij materiali ka shënuar rritje të vazhdueshme, ku Serbia mbetet ndër partnerët kryesorë nga vjen ky produkt. Në këtë linjë, vonesat në vënien në punë të kapaciteteve vendase po rrisin kostot e operimit për kompanitë dhe po zbehin realizimin e suksesshëm të projekteve dhe investimeve. Përballë këtij realiteti, Dhoma kërkon një reformë rrënjësore të procedurave, shmangien e burokracisë së tepërt, reduktimin e institucioneve ndërlidhëse dhe caktimin e afateve më të shkurtra kohore për shqyrtimin e lëndëve. Ndërkaq, DHTIK e shikon si jetike përmbylljen e shpejtë të ndryshimeve ligjore për Pronën Publike, si dhe ngritjen e një mekanizmi funksional për bashkërendimin mes institucioneve. Sipas Dhomës, çdo institucion duhet të ketë afate të qarta ligjore për trajtimin e kërkesave, me qëllim ndërtimin e një mjedisi sa më të favorshëm, efikas dhe të parashikueshëm për komunitetin e biznesit dhe investitorët.