Incidenti në klubin e natës: Sulmuesi Ivan Toney del para gjykatës dhe mohon akuzat për sulm

Sulmuesi anglez Ivan Toney ka hedhur poshtë zyrtarisht akuzat për sulm fizik, të cilat lidhen me një ngjarje të dyshuar të regjistruar në dhjetor të vitit 2025 brenda një lokali nate në kryeqytetin britanik. Të enjten, futbollisti u paraqit pranë Gjykatës së Kurorës në Southwark, ku deklarua se është i pafajshëm. Ndërkohë, trupa gjyqësore ka caktuar datën 12 qershor 2028 për nisjen e procesit gjyqësor ndaj tij. Sipas hetimeve paraprake, ngjarja dyshohet se ka ndodhur në një qendër koncertesh dhe klub nate në qendër të Londrës, ku një mosmarrëveshje verbale mes Toneyt dhe Saber Da Silvas dyshohet se ka degjeneruar në dhunë fizike. Bëhet e ditur se ish-sulmuesi i skuadrës së Brentfordit dyshohet se e ka goditur me kokë dhe më pas me grushte Da Silvajn, i cili si pasojë ka pësuar dëmtime në zonën e hundës dhe në gishta. Autoritetet policore ndërhynë në vendngjarje brenda 30 minutave, duke e shoqëruar lojtarin jashtë ambienteve të lokalit. Pas hetimeve të zhvilluara nga Policia Metropolitane, në korrik të këtij viti, Toney u zyrtarizua si i pandehur. Përfaqësuesi ligjor i lojtarit kishte theksuar më herët se futbollisti ishte i tronditur nga kjo akuzë, por mirëpriste mundësinë për të pastruar emrin e tij para drejtësisë. Data e caktuar për gjyq, 12 qershor 2028, përkon vetëm tri ditë pas startit zyrtar të Kampionatit Evropian, i cili do të bashkëpritet nga Mbretëria e Bashkuar dhe Republika e Irlandës. Kjo situatë mund të rrezikojë seriozisht angazhimin e mundshëm të Toneyt me Kombëtaren në atë turne, kohë në të cilën ai do të jetë në moshën 32-vjeçare. Gjatë karrierës së tij, Toney ka realizuar 72 gola në katër sezone me fanellën e Brentfordit, para se në vitin 2024 të ndryshonte ambient për të vijuar karrierën në Arabinë Saudite me klubin Al-Ahli.