Çështja e Valon Llukës kthehet në pikën zero, Supremja jep fjalën e fundit për masën e sigurisë

Gjykata Supreme e Kosovës ka marrë vendim që të pranojë pjesërisht kërkesën e avokatëve mbrojtës të Valon Llukës, duke shfuqizuar kështu aktvendimet e mëparshme të shkallës së parë dhe të Apelit që kishin të bënin me masën e paraburgimit ndaj tij. Megjithatë, pavarësisht këtij vendimi, Lluka do të vijojë të qëndrojë prapa grilave deri në një vendimmarrje të re, ndërkohë që lënda penale i është kthyer Gjykatës Themelore në Prishtinë për rishqyrtim dhe rivendosje. Në një përgjigje zyrtare, nga ky institucion i drejtësisë u bë e ditur: “Lidhur me kerkesen tuaj, ju njoftojme se Kolegji i Gjykatës Supreme të Kosovës, në çështjen penale ndaj të pandehurit V.L., për shkak të veprave penale “Mashtrimi lidhur me pranimin e fondeve nga Komuniteti Ndërkombëtar”, nga neni 325, të KPRK-së, “Mashtrimi”, nga neni 323 të KPRK-së, “Lidhja e kontratës së dëmshme”, nga neni 285 të KPRK-së, dhe “Shpërdorimi i pasurisë së huaj”, nga 318 të KPRK-së, duke vendosur lidhur me kërkesën për mbrojtje të ligjshmërisë të mbrojtësit të të pandehurit, paraqitur kundër aktvendimit të Gjykatës Themelore në Prishtinë dhe aktvendimit të Gjykatës së Apelit të Kosovës, pjesërisht ka aprovuar kërkesën e mbrojtësit të të pandehurit. Çështja i është kthyer gjykatës së shkallës së parë në rivendosje. I pandehuri ka mbetur në paraburgim deri në marrjen e një vendimi të ri nga gjykata e shkallës së parë”. Arsyeja e këtij vendimi nga Gjykata Supreme lidhet me faktin se Gjykata Themelore nuk kishte ofruar argumente të mjaftueshme dhe të mirëfillta për të argumentuar pretendimet e saj se ekziston rreziku që i pandehuri të ndikojë te dëshmitarët apo të dëmtojë provat materiale. Sipas vlerësimit të Supremes, gjykata e shkallës së parë ishte mjaftuar vetëm me citimin e neneve ligjore, pa dhënë shpjegime të qarta se cilat rrethana konkrete faktojnë ekzistencën e një rreziku të tillë. Për këtë arsye, Gjykata Supreme ka udhëzuar që gjatë procesit të rivendosjes, trupi gjykues duhet të argumentojë me prova të prekshme çdo vendim që ka të bëjë me vazhdimin e paraburgimit të Llukës.