Barcelona ndryshon planin për janarin, Flick kërkon përforcim në mbrojtje

Barcelona po e shqyrton sërish mundësinë e transferimit të një qendërmbrojtësi gjatë afatit kalimtar të janarit, pasi Hansi Flick është tashmë i hapur për përforcimin e kësaj pozite. Trajneri gjerman, i cili gjatë verës kishte vendosur të mos transferonte një futbollist për këtë repart, mund ta ndryshojë qëndrimin e tij për shkak të problemeve të paraqitura në fazën defensive dhe numrit të madh të lëndimeve që po e kushtëzojnë skuadrën. Gjatë afatit kalimtar të verës, drejtuesit e klubit katalunas kishin shqyrtuar mundësinë e transferimit të një qendërmbrojtësi për ta përforcuar repartin më të rëndësishëm në skemën e Flickut. Një nga emrat që ishte përmendur më së shumti ishte Alessandro Bastoni i Interit, por në fund trajneri gjerman kishte vendosur se nuk ishte e nevojshme të bëhej një përforcim në atë pozitë. Situata tani është ndryshe. Reparti defensiv nuk po ofron sigurinë e pritur, ndërsa Barcelona po përballet me probleme fizike të futbollistëve, të cilat po ia kufizojnë Flickut alternativat për të ndërtuar një mbrojtje të qëndrueshme. Një tjetër shqetësim për katalunasit është gjendja e Andreas Christensenit. Qendërmbrojtësi danez ka më shumë se një muaj që është jashtë fushave për shkak të lëndimit, duke e bërë edhe më të vështirë planifikimin e trajnerit për pjesën e dytë të sezonit. Për këtë arsye, drejtuesit e Barcelonës dhe stafi teknik po e shqyrtojnë mundësinë e ndërhyrjes në tregun e janarit, megjithëse një operacion i tillë nuk do të jetë i lehtë. Afati kalimtar dimëror zakonisht ofron më pak mundësi sesa ai i verës, pasi klubet hezitojnë t’i lënë futbollistët e tyre të largohen në mes të sezonit. Nëse Barcelona vendos të veprojë, do të duhet të përcaktojë profilin e duhur: një qendërmbrojtës me përvojë në nivelet më të larta, i cili mund të japë kontribut të menjëhershëm, apo një lojtar më të ri, me potencial për t’u zhvilluar dhe për t’u bërë pjesë e rëndësishme e skuadrës në të ardhmen. Një nga faktorët kryesorë që do ta përcaktojë realizimin e këtij transferimi është gjendja financiare e klubit dhe hapësira që Barcelona ka në kuadër të rregullave të Fair Play-it financiar. Drejtuesit katalunas duhet t’i analizojnë me kujdes mundësitë reale për të sjellë një përforcim, duke marrë parasysh edhe kushtet ekonomike që mund të ofrojnë klubet gjatë janarit. Në këtë situatë, vëmendje do të ketë edhe te Alejandro Balde. Mbrojtësi i krahut të majtë mund ta shqyrtojë mundësinë e largimit nëse vazhdon të ketë më pak minuta lojë sesa pret. Një largim i mundshëm i tij mund t’i krijonte Barcelonës më shumë hapësirë në planifikimin e skuadrës dhe potencialisht ta lehtësonte ardhjen e një futbollisti të ri, në varësi të kushteve financiare të marrëveshjes.