Një dekadë pas arit olimpik, Majlinda Kelmendi thyen heshtjen dhe bëhet pjesë e Instagramit

Një dekadë pasi shkroi historinë e artë në Lojërat Olimpike “Rio 2016”, ikonë e xhudos shqiptare, Majlinda Kelmendi, ka vendosur t'i japë fund distancës së saj me rrjetet sociale, duke u bërë tashmë pjesë e platformës Instagram përmes llogarisë zyrtare @themajlindakelmendi. Kampionja e madhe e cila ngjiti sportin tonë në majat botërore shumë kohë përpara se të kishte një komunitet ndjekësish në internet, ka vlerësuar se tashmë ka ardhur momenti për të provuar një dimension tjetër të vëmendjes publike, e cila vjen pas një karriere të mbushur me sakrifica e suksese. Ndonëse rrjetet sociale ofrojnë mundësi të shkëlqyera për komunikim të drejtpërdrejtë, frymëzim dhe menaxhim më të mirë të imazhit, ato shpesh shoqërohen edhe me ngarkesa, kritika e pritshmëri të vazhdueshme. Për Majlinda Kelmendin, fokusi ka qenë gjithmonë tek puna dhe rezultatet, ndaj ky hap i ri është kryekrejt një zgjedhje personale. Në një intervistë të dhënë për faqen zyrtare të Bashkimit Evropian të Xhudos (EJU), xhudistja legjendare ka zbuluar arsyet e këtij vendimi të papritur, duke folur hapur rreth mediave dhe botës digjitale. EJU: Si ndiheni në përgjithësi për mediat? Majlinda Kelmendi: “Gjithmonë kam besuar se mediat luajnë një rol të rëndësishëm në sport. Ato i ndihmojnë njerëzit të përcjellin rrugëtimin e sportistëve, të festojnë arritjet e tyre dhe të frymëzojnë gjeneratën e ardhshme. Në të njëjtën kohë, unë gjithmonë kam preferuar të përqendrohem te puna ime, e jo te rrjetet sociale, dhe t’i lë rezultatet të flasin vetë, në vend që të kërkoj vëmendje.” EJU: Pse pikërisht tani? Majlinda Kelmendi: “Të jem e sinqertë, nuk ka ndonjë arsye të vetme konkrete. Mendoj se thjesht ka ardhur koha e duhur. Për shumë vite kam qëndruar larg rrjeteve sociale, por tani jam kureshtare ta përjetoj vetë këtë eksperiencë dhe të shoh se ku do të më çojë.” EJU: Çfarë ju shtyu të vendosnit për hapjen e llogarive tuaja zyrtare? Majlinda Kelmendi: “Mbi të gjitha, kureshtja. Në të vërtetë, nuk kam pasur kurrë një prani zyrtare në rrjetet sociale dhe mendova se do të ishte interesante të krijoja një të tillë. Gjithashtu, kam një ekip profesional që do të kujdeset për menaxhimin e këtyre platformave, prandaj ndihem e qetë për ta ndërmarrë këtë hap.” EJU: Si ndiheni për këtë vendim? Cilat janë përparësitë dhe mangësitë? Majlinda Kelmendi: “Jam e emocionuar, por, sinqerisht, nuk e di saktësisht se çfarë të pres. Është diçka krejtësisht e re për mua. Ana pozitive është se do të kem mundësinë të komunikoj drejtpërdrejt me njerëzit dhe të ndaj pjesë nga rrugëtimi im. Natyrisht, rrjetet sociale sjellin edhe përgjegjësi dhe kritika, por jam e gatshme të mësoj gjatë këtij procesi.” EJU: Cila ka qenë përvoja juaj më e mirë dhe më e keqe personale me mediat? Majlinda Kelmendi: “Në përgjithësi, përvoja ime me mediat ka qenë pozitive. Gjithmonë e kam vlerësuar mbështetjen dhe respektin që kam marrë gjatë gjithë karrierës sime. Ashtu si çdo personazh publik, ka pasur raste kur lajmet ose komentet nuk kanë qenë plotësisht të sakta, por kjo është pjesë e të qenit në qendër të vëmendjes publike. Unë preferoj të përqendrohem te gjërat që mund t’i kontrolloj dhe të vazhdoj përpara.” Trashëgimia e jashtëzakonshme e Majlinda Kelmendit u gdhend në historinë e sportit botëror shumë kohë para se pëlqimet dhe numri i ndjekësve të përcaktonin suksesin e atletëve. Sot, dhjetë vite pas atij triumfi të paharrueshëm në arenën olimpike, kampione e madhe po ndërton një urë të re komunikimi me publikun, krejtësisht sipas kushteve dhe dëshirës së saj.