Hartohet strategjia shtetërore për Hagën, Konjufca zbulon hapat e ardhshëm institucionalë

Ministri i Punëve të Jashtme i Kosovës, Glauk Konjufca, ka njoftuar se është mbajtur takimi i parë themelues i Grupit Punues, i cili do të merret me përgatitjen e Strategjisë Shtetërore për procedurat e apelit pranë Dhomave të Specializuara në Hagë. Konjufca ka bërë të ditur se institucionet e Kosovës do t'u qëndrojnë pranë me mbështetje maksimale ish-krerëve të Ushtrisë Çlirimtare të Kosovës në fazën e apelit, duke sinjalizuar një front të përbashkët shtetëror për mbrojtjen e vërtetës historike të luftës dhe parandalimin e çdo tendence për tjetërsimin e saj. "Deklarata e Kuvendit të Republikës së Kosovës e 28 shtatorit shprehu vullnetin tonë të përbashkët për ta kundërshtuar aktgjykimin e padrejtë ndaj krerëve të UÇK-së dhe për ta mbrojtur të vërtetën e luftës sonë çlirimtare. Në vijim të saj dhe të vendimit të marrë nga Qeveria më 14 tetor, sot kryesova mbledhjen konstituive të Grupit Punues për hartimin dhe harmonizimin e Strategjisë Shtetërore lidhur me procedurat e apelit para Dhomave të Specializuara në Hagë", ka thënë ai. Gjatë këtij takimi janë shqyrtuar boshtet kryesore të strategjisë, janë ndarë detyrat për grupet përgjegjëse dhe është miratuar kalendari i përgjithshëm i veprimit. Theksi u theksua te sigurimi i mbështetjes shtetërore për ish-drejtuesit e UÇK-së në betejën ligjore të apelit, si dhe te angazhimi i palëkundur për të mbrojtur narrativën e drejtë të luftës çlirimtare në rrafshin ndërkombëtar. Sipas Konjufcës, trashëgimia e UÇK-së mbetet element unifikues përtej çdo ndarjeje politike, pasi ajo përbën gurthemelin e lirisë dhe shtetësisë. Të gjitha institucionet dhe faktorët politikë në vend ndajnë përgjegjësinë e përbashkët për të qëndruar të bashkuar në këtë mision për mbrojtjen e të drejtës historike të popullit të Kosovës.