Hernan Crespo del në mbrojtje të Gattusos: Kritiket duhet t’i kërkojnë falje menjëherë

Gennaro Gattuso, ish-strategu i Hajdukut, ka hyrë në historinë e Lazios duke regjistruar startin më të suksesshëm të një sezoni në analet e klubit nga kryeqyteti italian. Pas zhvillimit të nëntë javëve në elitën e futbollit italian, Serie A, skuadra e tij ka arkivuar tetë fitore dhe vetëm një barazim, duke u pozicionuar e vetme në majën e renditjes tabelore me gjithsej 25 pikë të tubuara. Këto arritje mbresëlënëse janë vlerësuar nga ish-sulmuesi i njohur argjentinas, Hernan Crespo, i cili thekson se Gattuso meriton ndjesë publike nga të gjithë ata që e vunë në shënjestër me kritika pas periudhës jo të mirë në krye të Përfaqësueses së Italisë. Crespo, i cili gjatë periudhës së tij si futbollist ka mbrojtur ngjyrat e klubeve të mëdha si Lazio, Interi, Milani dhe Chelsea, gjatë një prononcimi për të përditshmen sportive italiane ‘La Gazzetta dello Sport’, veçoi se tekniku italian është arkitekti kryesor i ecurisë fantastike të bardhekaltërve. “Pse Lazio të mos mund të luftojë për titullin kampion? Në skuadër është krijuar një kimi e veçantë dhe jam i sigurt se e gjithë kjo është falë Gattusos. Gattuso e di se si fitohet dhe, çfarë është edhe më e rëndësishme, e di se çfarë nevojitet për të fituar”, u shpreh Crespo. Sipas ish-sulmuesit argjentinas, pika më e fortë e Gattusos qëndron te mënyra se si i motivon futbollistët e tij, duke vënë theksin te përkushtimi dhe raporti i shkëlqyer që ka ndërtuar me grupin. “Para taktikës dhe teknikës vjen aspekti psikologjik. Nëse nuk je i përgatitur psikikisht, nuk do të arrish larg. Rino ka punuar në mentalitetin e lojtarëve të tij, i ka bindur që të bëjnë gjëra të caktuara dhe i ka motivuar”, u shpreh ai, duke shtuar më tej: “Përveç kësaj, ai është jashtëzakonisht këmbëngulës dhe kërkues. Kur të drejton një njeri i tillë, je i gatshëm të bësh gjithçka për të mos e zhgënjyer. Lojtarët e tij do të kalonin edhe përmes zjarrit për to.” I pyetur nëse kryeqytetasit e meritojnë kreun e tabelës, Crespo dha një përgjigje të prerë: “Absolutisht, e meriton plotësisht. Tetë fitore dhe një barazim, çfarë mund të kishte bërë më shumë?” Në fund të prononcimit të tij, argjentinasi iu referua valës së kritikave që u derdhën mbi Gattuson pas dështimit për ta kualifikuar Italinë në Kampionatin Botëror të vitit 2026. “Të gjithë ata që e kritikuan për përvojën e tij në stolin e kombëtares tani do të duhet t’i rishqyrtojnë qëndrimet e tyre dhe t’i kërkojnë falje. Por mirë, të gjithë e dimë se futbolli është një botë e çuditshme”, përfundoi Crespo.