Brukseli i dërgon mesazh të prerë Ekzekutivit të ardhshëm serb: Zbatoni detyrimet e Ohrit dhe marrëveshjet me Kosovën

Bashkimi Evropian i ka përcjellë një mesazh të qartë qeverisë së ardhshme të Serbisë, e cila do të dalë nga procesi zgjedhor, duke kërkuar qasje konstruktive në bisedimet për normalizimin e marrëdhënieve me Kosovën, si dhe përmbushjen e plotë të të gjitha akteve të dakorduara deri më tani. Këto qëndrime i ka bërë të ditur një zëdhënës i bllokut evropian, i cili ka theksuar se verdhkti i zgjedhjeve të fundit në Serbi nuk cenon në asnjë mënyrë themelet apo detyrimet që rrjedhin nga ky proces dialogu i ndërmjetësuar nga BE-ja. “Procesi i dialogut të udhëhequr nga BE-ja nuk kushtëzohet nga figura të caktuara politike. Të gjitha angazhimet e deritanishme mbeten në fuqi, duke përfshirë Marrëveshjen e vitit 2023 për rrugën drejt normalizimit dhe aneksin e zbatimit të saj, e njohur ndryshe si Marrëveshja e Ohrit”, ka deklaruar zëdhënësi. Po ashtu, i njëjti burim ka vënë në dukje se aktualisht është ende herët për të dhënë parashikime rreth ndonjë ndryshimi të mundshëm në qasjen e Serbisë ndaj dialogut apo se çfarë ndikimi mund të kenë ato në dinamikën e përgjithshme. “Nga Serbia presim vazhdimësi të angazhimit konstruktiv, respektim të detyrimeve të marrë përsipër dhe kontribut konkret drejt normalizimit. Bashkimi Evropian mbetet plotësisht i hapur për bashkëpunim me udhëheqësinë e re, me qëllim ruajtjen e ritmit të këtij procesi”, ka përfunduar zëdhënësi.