Test i madh për Shqipërinë U-21, kuqezinjtë do të maten me Spanjën në “Air Albania”

Federata e Futbollit ka bërë zyrtar kalendarin e ndeshjes së dytë miqësore për Kombëtaren U-21 gjatë muajit nëntor, duke caktuar një sfidë spektakolare për ekipin tonë shpresë. Talentet kuqezinj do të masin forcat me bashkëmoshatarët e tyre nga Spanja U-21 më 17 nëntor, me fillim nga ora 19:00, nën dritat e stadiumit “Air Albania”. Kjo përballje vjen menjëherë pas duelit kontrollues kundër Luksemburgut, të parashikuar për t'u luajtur më 13 nëntor, duke u shndërruar në një provë madhore për grupin e lojtarëve që drejtohen nga trajneri Alban Bushi, teksa vijojnë puna përgatitore për Kampionatin Europian U-21 të vitit 2027. Ndeshja kundër një prej superfuqive të kontinentit në këtë fashë moshash i jep mundësi përfaqësueses shqiptare të matë nivelin aktual dhe të fitojë pjekuri ndërkombëtare në prag të angazhimeve zyrtare të ardhshme. Për kujtesë, Shqipëria është shpallur një ndër vendet nikoqire të Kampionatit Europian U-21 2027, çka do të thotë se biletën për në fazën finale të këtij eventi madhështor e ka të siguruar që tani.