PDK akuzon RTK-në për manipulim: Kërkuam lirim të plotë, jo ulje dënimi për krerët e UÇK-së

Partia Demokratike e Kosovës ka reaguar ashpër ndaj raportimit të fundit të transmetuesit publik, RTK, në edicionin qendror të lajmeve, duke e cilësuar atë si të pavërtetë dhe ofenduese. Në fokus të pakënaqësisë së PDK-së është pretendimi i televizionit se kjo parti ka kërkuar “uljen e dënimeve për krerët e UÇK-së”. Sipas subjektit opozitar, ky interpretim është një shtrembërim i qëllimshëm i qëndrimit të tyre zyrtar. PDK-ja rithekson se ka kundërshtuar hapur aktgjykimin e shkallës së parë dhe se kërkesa e tyre e pandryshueshme mbetet lirimi i plotë i çlirimtarëve. Ata kërkojnë që shteti të angazhohet maksimalisht për të ofruar mbrojtjen më të mirë juridike gjatë procesit të apelit, synim ky që pasqyrohet edhe në nismën e tyre legjislative për ndryshimin dhe plotësimin e Ligjit për Dhomat e Specializuara. “Nuk pranojmë që kërkesa jonë për drejtësi dhe lirim të plotë të paraqitet para publikut si kërkesë për ulje dënimesh”, thuhet në reagimin e partisë. PDK-ja vlerëson se një qasje e tillë gazetareske ngre pikëpyetje serioze mbi objektivitetin e politikës redaksionale të RTK-së, duke lënë të kuptohet se prapa këtij raportimi mund të fshihen agjenda politike. Në fund të reagimit, Partia Demokratike e Kosovës i ka bërë thirrje zyrtare transmetuesit publik që ta korrigjojë menjëherë kronikën në fjalë, të reflektojë saktë qëndrimet e tyre dhe të kërkojë falje publike për dezinformimin e shkaktuar.