PDK akuzon RTK-në për manipulim: Kërkesa jonë është lirimi i krerëve të UÇK-së, jo ulja e dënimit

Partia Demokratike e Kosovës (PDK) ka hedhur poshtë me forcë raportimin e transmetuesit publik në edicionin qendror të lajmeve, duke e cilësuar atë si të pavërtetë dhe ofendues. Sipas PDK-së, pretendimi se kjo parti ka kërkuar “uljen e dënimeve për krerët e UÇK-së” është një shtrembërim i qëllimshëm i fakteve. Në reagimin e saj zyrtar, PDK-ja thekson se pozicioni i saj mbetet i pandryshuar: kundërshtimi i aktgjykimit të shkallës së parë dhe kërkesa e vazhdueshme për pafajësinë dhe lirimin e plotë të çlirimtarëve. Partia bën thirrje për drejtësi dhe kërkon që shteti të angazhohet maksimalisht në sigurimin e një mbrojtjeje sa më efikase gjatë procesit të apelit, angazhim ky që përputhet edhe me nismën e tyre legjislative për ndryshimin dhe plotësimin e Ligjit për Dhomat e Specializuara. Subjekti opozitar ka shprehur indinjatën e tij ndaj mënyrës se si kërkesa për lirim është interpretuar si kërkesë për zbutje dënimi. Për PDK-në, një qasje e tillë gazetareske ngre pikëpyetje të rënda mbi pavarësinë e politikës redaksionale të RTK-së, duke krijuar përshtypjen e një deformimi të qëllimshëm me prapavijë politike. Në fund të këtij reagimi, PDK-ja i ka bërë thirrje transmetuesit publik që të ndërmarrë hapat e nevojshëm për korrigjimin e menjëhershëm të kronikës, sqarimin korrekt të qëndrimit të partisë dhe kërkimin e një faljeje publike ndaj opinionit dhe të akuzuarve.