Kreu i diplomacisë ruse jep paralajmërimin e ashpër: Lufta në Ukrainë shkon drejt një tjetër faze përshkallëzimi

Ministri i Jashtëm i Rusisë, Sergei Lavrov, ka lëshuar një paralajmërim serioz duke theksuar se konflikti i armatosur në Ukrainë jo vetëm që do të vazhdojë, por ekziston rreziku real që të përshkallëzohet edhe më tej në muajt në vijim. Gjatë deklaratave të bëra të martën, kryediplomati rus u shpreh se aktualisht nuk ka asnjë zhvillim pozitiv apo lëvizje konkrete në rrafshin diplomatik që do të mund t'i jepte fund kësaj lufte. Duke iu referuar bisedës telefonike të zhvilluar gjatë së martës ndërmjet presidentit rus Vladimir Putin, nga njëra anë, dhe liderëve të Finlandës dhe Norvegjisë, nga ana tjetër, Lavrov nënvizoi se gjatë këtij komunikimi nuk është hedhur në tavolinë asnjë propozim i ri për zgjidhjen e krizës ukrainase. Në fjalën e tij, ministri rus akuzoi gjithashtu shtetet evropiane se po përpiqen me çdo kusht të sigurojnë një vend dhe një rol aktiv në tryezën e ardhshme të negociatave për paqe.