Përparim Rama: Qëndresa e Ferdonije Qerkezit në protestë, thirrje për ndërgjegjen tonë kolektive

Kryetari i Prishtinës, Përparim Rama, ka reaguar pas pjesëmarrjes së Ferdonije Qerkezit në protestën e organizuar në Gjakovë në mbështetje të ish-drejtuesve të Ushtrisë Çlirimtare të Kosovës. Rama vlerësoi lart figurën e nënës së përjetimeve të mëdha, e cila pavarësisht humbjeve të rënda, vazhdon të jetë zë i fuqishëm i drejtësisë. Duke evokuar tragjedinë e rëndë të familjes së saj gjatë periudhës së luftës, Rama kujtoi se si forcat serbe ia shuan vatrën duke ia vrarë bashkëshortin dhe katër djemtë, përfshirë djalin më të vogël që ishte vetëm 14 vjeç. Megjithatë, ai nënvizoi se pavarësisht përpjekjeve për ta shuar, zëri i saj mbetet i pathyeshëm. Sipas të parit të kryeqytetit, prania e zonjës Qerkezi në këtë tubim tejkalon dimensionin e një proteste të zakonshme. “Kur, pas gjithë kësaj tragjedie, Ferdonije Qerkezi gjen forcën të dalë sonte në rrugë kundër padrejtësisë, kjo nuk është vetëm protestë. Është akt politik dhe moral që na vendos të gjithëve përballë përgjegjësisë sonë”, ka deklaruar Rama. Ai shtoi se qëndresa e saj nuk është një kauzë vetjake, por pasqyrim i kujtesës së mijëra qytetarëve që u prekën nga lufta. Për Ramën, Ferdonije Qerkezi përfaqëson Kosovën që refuzon të harrojë, duke e cilësuar historinë e saj si ndërgjegjen kolektive të shoqërisë sonë.