Humbën në fushë, por thyen rekord financiar: Barcelona arkëton shifra marramendëse nga “El Clasico”

Pavarësisht rezultatit zhgënjyes në fushën e blertë ndaj rivalit të përjetshëm, FC Barcelona ka dalë triumfuese në aspektin financiar, duke shënuar një rekord historik të të ardhurave nga shitja e biletave në përballjen e zhvilluar të dielën kundër Real Madridit. Klubi katalanas ka arkëtuar saktësisht 19,105,768 euro nga biletat e këtij “El Clasico”, duke lënë pas rekordin e mëparshëm prej 16,465,731 eurosh të vendosur më 10 maj. Edhe pse numri i shikuesve ishte më i ulët këtë herë – me 60,055 tifozë të pranishëm në krahasim me 62,213 në ndeshjen e kaluar – të ardhurat totale rezultuan dukshëm më të larta falë politikës së re të çmimeve dhe ofertës së zgjeruar VIP në stadiumin “Spotify Camp Nou”. Në këtë duel, çmimi mesatar i një biletë u regjistrua në 984 euro, duke shënuar një rritje prej 10% krahasuar me edicionin e kaluar. Drejtuesit e klubit aplikuan çmime dinamike për të maksimizuar përfitimet nga çdo ulëse, duke i përshtatur ato sipas kërkesës së tregut dhe pozicionit në stadium. Sektori i mikpritjes VIP dëshmoi një sukses të jashtëzakonshëm, ku çmimi mesatar për një vend të kësaj kategorie arriti në 2,727 euro. Zgjerimi i hapësirave premium në katër rreshta në të gjithë Kategorinë e Dytë ishte vendimtar për të kompensuar pjesëmarrjen më të vogël fizike dhe për të arritur këtë shifër rekord. Megjithatë, korrja e fitimeve nuk u kufizua vetëm te biletat. Barcelona regjistroi shitje të jashtëzakonshme edhe në dyqanin zyrtar të klubit, ndërsa bashkëpunimi i veçantë me reperin Tyler, The Creator gjeneroi të ardhura nga fanellat dhe mallrat e tregtuara që tejkalojnë çdo partneritet të mëparshëm artistik të realizuar ndonjëherë në “Spotify”. Këto shifra financiare shërbejnë si një dëshmi e qartë e potencialit të madh komercial që do të ketë “Spotify Camp Nou” pas përfundimit të plotë të punimeve të rindërtimit. Kur stadiumi të jetë gati, kapaciteti i tij do të arrijë në 104,600 spektatorë, duke përfshirë afërsisht 9,500 ulëse VIP, një rritje e ndjeshme kjo nga rreth 5,000 vende VIP që janë në dispozicion aktualisht.