Vrasja e Arlinda Zekajt në Vitomiricë, EULEX dënon ashpër aktin dhe po ndjek rastin nga afër

Misioni i Bashkimit Evropian për Sundim të Ligji në Kosovë (EULEX) ka reaguar me ashpërsi ndaj vrasjes së Arlinda Zekajt në fshatin Vitomiricë të Pejës, duke i përcjellë ngushëllimet më të thella familjarëve, të afërmve dhe gjithë atyre që po përjetojnë këtë humbje të rëndë. Në deklaratën e lëshuar për medie, ky mision ka vlerësuar se femicidi paraqet shkallën më të lartë dhe më të rrezikshme të dhunës me bazë gjinore, duke e cilësuar atë si një shkelje flagrante të të drejtave fundamentale të grave. “Asnjë grua apo vajzë nuk duhet të jetojë me frikën e dhunës”, thuhet në njoftim, ku gjithashtu vihet theksi te domosdoshmëria e ofrimit të mbrojtjes dhe mbështetjes për çdo femër që kërkon ndihmë. EULEX-i ka ripërsëritur angazhimin e tij të palëkundur për t'i dalë në krah institucioneve vendore në përpjekjet e tyre për të parandaluar dhe luftuar dhunën me bazë gjinore, për të mbrojtur gratë dhe fëmijët që ndodhen në rrezik, si dhe për të lehtësuar qasjen në drejtësi dhe në shërbimet e nevojshme për viktimat e mbijetuara. “EULEX-i qëndron i përkushtuar t’i mbështesë institucionet e sundimit të ligjit të Kosovës në angazhimet e tyre të vazhdueshme për parandalimin dhe reagimin ndaj dhunës me bazë gjininë, mbrojtjen e grave dhe fëmijëve në rrezik, dhe fuqizimin e qasjes në drejtësi dhe mbështetje për të mbijetuarit. Këtu përfshihet promovimi i përdorimit efektiv të instrumenteve për vlerësimin e rrezikut, zbatimi i urdhërmbrojtjeve, dhe qasja e koordinuar, me viktimën në fokus, me përfshirjen e institucioneve, shoqërisë civile dhe komuniteteve. Angazhimet e qëndrueshme janë poashtu esenciale për adresimin e qëndrimeve dhe pabarazive që e mundësojnë dhunën kundër grave”, shtohet tutje në reagim. Misioni evropian ka vlerësuar se angazhimet afatgjata janë jetike edhe për luftimin e paragjykimeve dhe pabarazive shoqërore që nxisin dhe ushqejnë dhunën ndaj gjinisë femërore. “Parandalimi i femicidit është përgjegjësi e përbashkët që kërkon përkushtim, bashkëpunim dhe veprim këmbëngulës të vazhdueshëm”, përfundon mesazhi i misionit. Në fund, EULEX-i ka bërë të ditur se, duke u bazuar në mandatin që posedon, po e përcjell me vëmendje të shtuar zhvillimin e këtij rasti dhe do të vijojë të ndihmojë organet kompetente në përmbushjen e përgjegjësive të tyre.