Dy superfuqitë e La Ligës, Real Madrid dhe Barcelona, vënë në shënjestër mbrojtësin e Tottenhamit

Real Madridi dhe Barcelona kanë shfaqur interesim serioz dhe po ndjekin me vëmendje hapat e Pedro Porros, i cili po rikuperon formën e tij më të mirë pas periudhës së vështirë me lëndimet. Futbollisti spanjoll, i cili luan në rolin e mbrojtësit të djathtë, është kthyer në prioritet për dy skuadrat e mëdha që synojnë të shtojnë cilësi dhe konkurrencë në këtë repart. Në kampin madrilen prej kohësh po kërkohet një alternativë afatgjatë dhe stabile për këtë pozitë, ndërkohë që te katalanasit situata mbetet e hapur për shkak të së ardhmes ende të papërcaktuar të Jules Koundes. Megjithatë, arritja e marrëveshjes për shërbimet e spanjollit pritet të jetë një mision tejet sfidues, duke pasur parasysh se ai është i lidhur me klubin londinez përmes një kontrate të vlefshme deri në verën e vitit 2031. Burime pranë mediave në Spanjë bëjnë me dije se drejtuesit e skuadrës nga Premierliga do të kërkojnë një dëmshpërblim të majmë për ta lejuar largimin e tij, ndërsa një transferim i mundshëm gjatë merkatos së muajit janar duket aktualisht një opsion i largët.