Hapa konkretë te Milani: Gati marrëveshjet e reja për dy shtyllat kryesore të skuadrës

Klubi i Milanit ka ndërmarrë hapa konkretë për të siguruar të ardhmen e dy prej futbollistëve kyçë të organikës, duke nisur nga Christian Pulisic, i cili është shumë pranë finalizimit të kontratës së re. Falë paraqitjeve fantastike, ndikimit vendimtar dhe golave të shënuar, sulmuesi amerikan është shndërruar në një nga boshtet kryesore të ekipit, duke shtyrë drejtuesit kuqezi t'i ofrojnë një marrëveshje afatgjatë për ta mbajtur në Itali. Burimet pranë klubit bëjnë me dije se akordi i ri pritet të zyrtarizohet brenda ditëve në vijim, duke e lidhur Pulisic me fanellën kuqezi deri në verën e vitit 2031. Vlen të kujtohet se gjatë merkatos së kaluar, emri i lojtarit u lakua në media për shkak të interesimit nga disa skuadra të ndryshme, ku u përfol edhe një mundësi e bujshme për një transferim të mundshëm në Shtetet e Bashkuara. Megjithatë, numri një i klubit, presidenti Gerry Cardinale, refuzoi kategorikisht çdo mundësi shitjeje, duke mos e konsideruar asnjëherë largimin e tij si një opsion real.