Tragjedi në aksin Berat-Dimal, makina përplas për vdekje biçiklistin dhe plagos këmbësoren

Një ngjarje e rëndë ka tronditur këtë të martë qarkun e Beratit, pasi një aksident trafiku me pasojë vdekjen është shënuar në aksin rrugor Berat-Dimal, konkretisht në territorin e fshatit Moravë. Sipas informacioneve zyrtare, incidenti fatal ka ndodhur rreth orës 10:15, kur një automjet ka goditur një biçikletë që drejtohej nga 63-vjeçari K. S., duke i shkruar vdekjen e menjëhershme për shkak të plagëve të rënda. Përveç drejtuesit të mjetit të vogël, nga kjo përplasje ka pësuar dëmtime trupore edhe një kalimtare e rastit, e identitetit Dh. A., 63 vjeçe, e cila është dërguar menjëherë për ndihmë mjekësore në spital dhe aktualisht ndodhet nën kujdesin e mjekëve, jashtë rrezikut për jetën. Në lidhje me ngjarjen, blutë e Beratit kanë dhënë detajet e para përmes një njoftimi zyrtar: “Berat/Informacioni paraprak: Rreth orës 10:15, në aksin rrugor Berat–Dimal, në fshatin Moravë, shtetasi J. D., duke drejtuar automjetin, është përfshirë në një aksident rrugor me shtetasin K. S., 63 vjeç, i cili lëvizte me biçikletë. Si pasojë e aksidentit, shtetasi K. S. ka ndërruar jetë në vendngjarje. Gjithashtu, gjatë përplasjes është dëmtuar edhe këmbësorja, shtetasja Dh. A., 63 vjeçe, e cila është transportuar në spital dhe ndodhet jashtë rrezikut për jetën. Grupi hetimor ndodhet në vendngjarje dhe po kryen veprimet procedurale për sqarimin e rrethanave dhe përcaktimin e shkakut të aksidentit”, bën të ditur policia vendore.