Operacion policor në veri: Sekuestrohen armë, uniforma ushtarake dhe municione, një person në pranga

Policia e Kosovës ka ndërmarrë një aksion të suksesshëm në pjesën veriore të vendit, ku gjatë kontrolleve në dy lokacione të ndryshme ka arritur të gjejë dhe të konfiskojë sasi të konsiderueshme armatimesh, municionesh, si dhe pajisje ushtarake. Operacioni është zhvilluar të dielën në fshatin Dren të komunës së Leposaviqit dhe në fshatin Shipovë të Zubin Potokut, mbi bazën e informacioneve operative se në këto hapësira mund të ishin fshehur mjete të kundërligjshme. Në një objekt që shërbente si stallë në fshatin Dren, efektivët gjetën një armë përsëritëse M-56, dy pistoleta të modeleve CZ-99 dhe CZ Mod-70, si dhe 139 fishekë të llojeve të ndryshme. Në lidhje me gjetjet në Dren, autoritetet kanë prangosur shtetasin S.V. (i lindur në vitin 1971). Pas intervistimit të kryer në praninë e avokatit të tij mbrojtës, prokurori i rastit ka urdhëruar ndalimin e të dyshuarit për 48 orë. Një tjetër zbulim i rëndësishëm ndodhi në një shtëpi të pabanuar në fshatin Shipovë. Aty u sekuestruan një pushkë automatike AK-47 me gjashtë karikatorë dhe 157 fishekë, një pushkë gjuetie M-48 me 186 fishekë, një bajonetë, si dhe pajisje të ndryshme ushtarake, përfshirë uniforma me emblemë serbe, çanta dhe mjete për ushqim. Për këtë rast, autoritetet bëjnë të ditur se deri në këto momente nuk ka persona të arrestuar. Ndaj këtyre dy rasteve, Prokuroria e Shtetit ka hapur hetime për veprën penale “Mbajtja në pronësi, kontroll ose posedim të paautorizuar të armëve”, ndërsa hetimet vijojnë për të zbardhur plotësisht rrethanat e posedimit të këtij arsenalit të armëve.