Moti për nesër: Rikthehen reshjet dhe ngricat, ja çfarë temperaturash na presin

Gjatë natës dhe në orët e para të mëngjesit të së martës, vendi ynë do të ndikohet nga kushte kryesisht të kthjellëta. Ky stabilitet i motit, i shoqëruar me depërtimin e masave të ftohta ajrore, pritet të krijojë kushte për ngrica lokale gjatë orëve të mëngjesit. Në vijim, situata meteorologjike do të ndryshojë me afrimin gradual të vranësirave, të shtrira nga lindja në drejtim të perëndimit. Këto vranësira do të shoqërohen me reshje të izoluara shiu gjatë pjesës së dytë të ditës, ndërsa në relievet malore parashikohen reshje dëbore. Sa i përket erës, ajo do të fryjë nga veriu dhe verilindja, duke qenë herë pas here mjaft e fuqishme, me shpejtësi që do variojnë nga 15 deri në 50 kilometra në orë. Trendi i temperaturave do të shënojë rënie të ndjeshme. Vlerat minimale termike do të luhaten mes -1 dhe 4 gradë Celsius, kurse ato maksimale do të ngrihen deri në intervalin prej 9 deri në 13 gradë Celsius.