Apeli i Natyra Kuçit: Fëmija i Arlinda Zekajt i pagjetur, familja e saj mbetet e pambrojtur

Ish-kandidatja për kryetare të Deçanit, Natyra Kuçi, ka shprehur shqetësimin e saj të thellë lidhur me sigurinë e familjes së të ndjerës Arlinda Zekaj, e cila u vra tragjikisht pak kohë më parë. Përmes një postimi në rrjetet sociale, Kuçi ka kërkuar vëmendjen e autoriteteve për fatin e djalit të viktimës, për të cilin pretendon se është i ndarë nga familja e tij. Në reagimin e saj, Kuçi ka vënë theksin te rreziku që i kanoset familjes Zekaj në Radavc, duke denoncuar mungesën e mbikëqyrjes policore. Ajo ka bërë të ditur se, përkundër faktit që i dyshuari për këtë vrasje të rëndë ndodhet ende në arrati, familja nuk gëzon asnjë lloj mbrojtjeje nga ana e forcave të rendit dhe se në atë zonë nuk është vërejtur asnjë patrullim policor. “Djali i kidnapuar, vrasësi në arrati, familja Zekaj në Radavc pa kurrfarë mbrojtjeje, as edhe një patrullë policie aty!”, ka shkruar ndër të tjera Kuçi, duke kërkuar reagim urgjent nga institucionet përkatëse. Në të njëjtën kohë, ajo nuk ka kursyer kritikat e ashpra ndaj ministres Donika Gërvalla. Kuçi ka shprehur indinjatën e saj ndaj deklaratave të ministres mbi mënyrën se si duhet të raportohet dhuna, duke i cilësuar këto këshilla si të papërshtatshme në rrethanat e rënda që po kalon kjo familje.