Albulena Haxhiu nis vizitën zyrtare në Shkup: Axhenda e takimeve të nivelit të lartë

Kryetarja e Kuvendit, Albulena Haxhiu, do të udhëtojë nesër, më 27 tetor, për një vizitë zyrtare në Maqedoninë e Veriut. Ajo do të pritet me nderime të larta shtetërore nga homologu i saj, Afrim Gashi. Agjenda e kësaj vizite përfshin një takim dypalësh me kryeparlamentarin Gashi, ndërsa në vijim, Haxhiu do të zhvillojë bisedime të rëndësishme edhe me krerët më të lartë të shtetit maqedonas, përkatësisht me Presidenten Gordana Siljanovska-Davkova dhe Kryeministrin Hristijan Mickoski. Krahas takimeve institucionale, programi i vizitës parasheh edhe bashkëbisedime me kryetarët e komunave ku shqiptarët përbëjnë shumicën e popullsisë. Po ashtu, Haxhiu do të ndalojë për një vizitë në Muzeun e Artit Bashkëkohor, duke e përmbyllur kështu agjendën e saj zyrtare.