Nisma e re kundër dezinformimit: Agjencia lançon aplikacionin falas për edukimin e gjeneratave të reja

Agjencia për Shërbime Mediatike Audio dhe Audiovizuele ka ndërmarrë një hap konkret drejt rritjes së vetëdijes dhe edukimit të gjeneratave të reja për identifikimin dhe luftimin e lajmeve të rreme. Sipas zëvendësdrejtorit të këtij institucioni, Muamer Bekiri, kjo nismë është ndërmarrë si domosdoshmëri për të mbrojtur të rinjtë nga manipulimi i mundshëm përmes informacioneve që qarkullojnë nga burime të pamatura dhe të padeklaruara. “Përmes këtyre ngjarjeve do të përfshihen të rinjtë, veçanërisht nxënësit e shkollave të mesme, mësuesit e tyre, politikbërësit, njerëzit që u përkasin grupeve të ndryshme të margjinalizuara, si dhe personat me aftësi të kufizuara dhe prindërit e tyre”, deklaroi Muamer Bekiri, zv. drejtor i Agjencisë për Shërbime Mediatike Audio dhe Audiovizuele. Ky projekt gëzon edhe mbështetjen e fuqishme të Ambasadës së Bashkimit Evropian në Shkup, prej nga theksojnë rëndësinë e madhe që ka përfshirja gjithëpërfshirëse e të rinjve nga të gjitha komunitetet etnike në vend. “Dhe tani është edhe maqedonishtja në shqip që i është bashkuar, të paktën kjo do të thotë që të rinjtë në Maqedoninë e Veriut mund ta luajnë lojën në gjuhën e tyre së bashku me të rinjtë në të gjithë Evropën”, theksoi Luciano Scambiato Licciardi, zëdhënës i BE-së në Shkup. Ky aplikacion është plotësisht falas dhe u mundëson të gjithë përdoruesve të kontrollojnë me lehtësi vërtetësinë e çdo lajmi që i intereson, duke u bazuar në të dhëna zyrtare për të dalluar informacionet e sakta nga ato të fabrikuara.