Kurorëzim i merituar: Luis de la Fuente rrëmben çmimin “Trajneri i vitit” për vitin 2026

Strategu i Kombëtares së Spanjës, Luis de la Fuente, është kurorëzuar si trajneri më i mirë i vitit gjatë ceremonisë madhështore të Topit të Artë, duke marrë kështu vlerësimin prestigjioz për sukseset e arritura në krye të 'Furisë së Kuqe'. Emri i tij u shoqërua me duartrokitje të shumta nga sallë, ndërsa dy yjet e Kombëtares, Rodri dhe Lamine Yamal, u ngritën në këmbë për ta përgëzuar menjëherë pas zyrtarizimit të fituesit. Në fjalën e tij para të pranishmëve, De la Fuente e vlerësoi këtë çmim si një privilegj të jashtëzakonshëm, duke nënvizuar se ky triumf nuk i takon vetëm atij, por është fryt i përpjekjeve të përbashkëta të të gjithë grupit. “Ta marr këtë çmim është një nder i jashtëzakonshëm. Të jem në mesin e të nominuarve është krenari. Të gjithë të nominuarit e kanë merituar këtë vlerësim”, deklaroi De la Fuente gjatë fjalimit të tij. Tekniku spanjoll insistoi se ky trofe përfaqëson një arritje kolektive të skuadrës që udhëheq, teksa nuk la pa përmendur dhe falënderuar stafin e tij teknik për kontributin e dhënë. “Është një çmim kolektiv për një ekip që kam nderin ta drejtoj. Kam një staf teknik të mrekullueshëm dhe bashkëpunëtorë të shkëlqyer. Dua të falënderoj Federatën Mbretërore Spanjolle të Futbollit, presidentin tonë Rafa Louzán dhe Aitor Karanka”, u shpreh ai. Në mbyllje të fjalës së tij, trajneri i njohur i dedikoi një falënderim të ndjerë familjes, duke shtuar se ky çmim shërben si shtysë e fuqishme për të vazhduar punën dhe për t'u përmirësuar edhe më tej në të ardhmen. “Suksesi nuk është kurrë përfundimtar nëse nuk ke aftësinë të vazhdosh të mësosh. Ky çmim është një motivim për të vazhduar të rritem. Suksesi na bën të dukshëm, ndërsa puna në ekip na bën të pathyeshëm”, përfundoi De la Fuente.