Debat i ashpër në Kuvend për fotografitë e politikanëve me persona të përfshirë në vrasje grash

Seanca e Kuvendit të Kosovës është shoqëruar me debate dhe përplasje verbale mes deputetëve, pasi u ngrit çështja e lidhjeve dhe fotografive të personaliteteve politike me persona të dyshuar ose të dënuar për vrasje të grave. Shkak u bënë imazhet e publikuara në rrjetet sociale që përfshijnë figura të njohura politike. Deputeti i Lëvizjes Vetëvendosje, Taulant Kelmendi, gjatë fjalës së tij në foltore, solli në vëmendje fotografitë e anëtarit të Aleancës për Ardhmërinë e Kosovës, Daut Haradinaj, në shoqërinë e një personi që e cilësoi si doras të Arlinda Sylaj-Zekajt, si dhe me bashkëshortin e viktimës. Ndonëse pranoi se afërsia politike dhe fotografitë nuk përbëjnë automatikisht fajësi penale, Kelmendi theksoi se ato ngrenë pikëpyetje serioze morale dhe se opinioni publik kërkon llogaridhënie. „Kemi raste kur ish-kryeministra, ish-deputetë e ish-kryetar të partive, për të cilët janë ngritur publikisht akuza apo pretendime për dhunë në familje. Në anën tjetër, kemi disa sekrete publike me të cilat i kemi pasur gjatë gjithë ditës në rrjete sociale, ku kultivohen raporte me vrasës e doras e madje edhe me dorasin dhe burrin e viktimës. Fotografitë shoqërimet dhe afërsia politike nuk është domosdoshmërisht dëshmi e përgjegjësisë penale të askujt. Ato ngrehin pyetje legjitime. Në këtë kontekst para moralizimit duhet një distancim, publiku ka të drejtë të kërkoj llogari për fotografitë. Madje, janë të përfshirë edhe ata që thoshin se qytetarët kanë pasur bomba nëpër xhepa. A distancohet sot zonja deputete me dorasin“, u shpreh Kelmendi. Në krahun tjetër, deputetja e AAK-së, Time Kadrijaj, ka reaguar ashpër ndaj atyre që i quajti përpjekje për të politizuar ngjarjet tragjike. Ajo insistoi se barra për parandalimin dhe trajtimin e krimeve u takon ekskluzivisht institucioneve të sigurisë dhe nuk duhet të hidhet tek individët përmes manipulimit të vëmendjes. Për të ilustruar standardet e dyfishta sipas saj, Kadrijaj përmendi një fotografi ku figuron Naim Murseli, i cili është dënuar me burgim të përjetshëm, në shoqërinë e kryeministrit Albin Kurti, duke shtruar pyetjen nëse janë ngritur ndonjëherë akuza të ngjashme për këtë rast. „Nuk kemi dashur me politizuar, sepse njerëzit nuk kanë pasur faj nëse ka ndodhur një vrasje. Shpërqendrimi i vëmendjes dhe kalimi i përgjegjësisë prej institucioneve tek individët kjo nuk ka kuptim. Unë kam një foto që Naim Murseli me burgim të përjetshëm është në foto me Albin Kurtin. A keni ndonjë sqarim këtu, a e keni dëgjuar dikë që ka akuzuar Albin Kurtin për këtë foto, nuk e ka akuzuar askush. Ky është shpërqendrim i vëmendjes, përgjegjësia është e institucioneve të sigurisë“, deklaroi Kadrijaj. Debati mori një kthesë tjetër kur deputeti Kelmendi replikoi sërish, duke i bërë thirrje publike deputetes Kadrijaj që të përdorë ndikimin e saj shoqëror për të bindur personin e inkriminuar që të dorëzohet para drejtësisë. „A mund ta shfrytëzoni këtë shoqëri që ta telefononi dorasin dhe të dorëzohet para organeve ligjzbatuese“, tha ndër të tjera Kelmendi në përfundim të replikës së tij.