"A duhet të më vrasë Jetoni që ju ta arrestoni?": Pyetja tragjike e Arlinda Zekajt pak para se t'i merrej jeta

Pak kohë para se të binte viktimë e një krimi të rëndë, Arlinda Zekaj i drejtoi strukturave të rendit një pyetje therëse që sot reflekton si një kambanë alarmi dhe dëshmi e qartë e dështimit institucional në mbrojtjen e jetës së saj. "A duhet të më vrasë mua Jetoni, që ju policia atëherë ta arrestoni atë?", kishte pyetur ajo efektivët e policisë, sipas dokumentacionit zyrtar të organeve të ndjekjes mbajtur më 25 tetor 2026. Gjatë dëshmisë së saj të fundit, e cila u mor më 25 tetor 2026 në orën 17:58, Arlinda kishte rrëfyer se si, pas një konflikti të çastit brenda ambienteve shtëpiake, ish-bashkëshorti i saj, Jeton Sylaj, e kishte fyer, kërcënuar rëndë dhe i kishte nxjerrë gjërat personale jashtë në oborr. Sipas rrëfimit të saj, pasi kishte përdorur lavatriçen për rrobat e familjarëve të Jetonit dhe kishte vendosur të lante rrobat e veta, ajo ishte drejtuar për në kuzhinë. Në atë moment, Jeton Sylaj kishte nisur të bërtiste dhe ta kërcënonte me fjalë fyese e intimiduese, duke i hedhur gardërobën në oborr. Përballë kësaj situate të tensionuar dhe e përfshirë nga paniku, ajo kishte njoftuar menjëherë autoritetet policore. Pavarësisht se kishte theksuar se nuk ndihej e sigurt, Arlinda kishte kundërshtuar strehimin në ndonjë qendër emergjente, duke insistuar se nuk kishte ndërmend të heqte dorë nga i biri dhe pasuria e saj e ligjshme. Megjithatë, tensionet e asaj dite nuk përbënin zanafillën e kalvarit të saj. Në epiqendër të mosmarrëveshjeve qëndronte edhe fatin i djalit të tyre 12-vjeçar, i cili mban shtetësi amerikane. Konflikti kishte marrë përmasa të tjera kur fëmija, pasi kishte shkuar për një vizitë te xhaxhai i tij, nuk ishte kthyer më pranë nënës. Arlinda akuzonte familjarët e ish-bashkëshortit se e kishin mbajtur fëmijën me pahir, duke e privuar nga e drejta e bashkëjetesës me të. Ky rast ishte paraqitur në polici më 10 korrik 2026 dhe mbante numrin e referencës 2026-DA-853. Pas intervistimeve të njëpasnjëshme të palëve dhe vetë të miturit, i cili fillimisht kishte shprehur dëshirën të qëndronte te familja e babait, hetimet nxorën në dritë një tjetër zhvillim: vetë babai kishte braktisur djalin duke u nisur drejt Shteteve të Bashkuara të Amerikës më 5 shtator 2026, duke ia lënë kujdestarinë personave të tretë. Duke u gjendur përballë këtyre rrethanave, Gjykata Themelore në Pejë mori vendim më 16 shtator që i mituri t'i kthehej nënës për kujdestari, duke përcaktuar gjithashtu detyrimin e alimentacionit dhe masat mbrojtëse ndaj Jeton Sylajt. Sipas urdhrit të gjykatës, Jeton Sylajt i ndalohej rreptësisht t'i afrohej Arlinda Zekajt në një distancë prej më pak se 2 metrash në banesën e saj dhe 20 metrash në hapësira publike, rrugë, qytet, fshat apo në vendin e punës. Po ashtu, atij i ndalohej çdo lloj dhune fizike apo psikike, bllokim lëvizjeje, fyerje apo kanosje ndaj viktimës. Përveç dosjes voluminoze hetimore të datës 16 tetor 2026, në dispozicion ishin edhe vendimet e datave 23 dhe 25 tetor, përmes të cilave Arlinda i bënte thirrje të vazhdueshme shtetit që të zbatohej vendimi për ribashkimin me djalin e saj.