Tragjedia e Arlinda Zekajt: Anita Haradinaj i kërkon avokates Hoxha qartësi për kërcënimet me mbiemrin e njohur

Anita Mucaj-Haradinaj, bashkëshortja e ish-kryeministrit Ramush Haradinaj, ka reaguar ashpër pas vrasjes tronditëse të Arlinda Zekajt. Pasi ka shprehur dhimbjen e saj të thellë për këtë ngjarje tragjike, ajo ka kërkuar që autori i krimit të përballet me drejtësinë dhe të marrë dësimin e merituar. Në deklaratën e saj publike, Mucaj-Haradinaj i është drejtuar avokates Adelina Hoxha me kërkesën e prerë për të sqaruar para opinionit publik dhe autoriteteve hetimore se cili individ me mbiemrin Haradinaj është përfshirë në kërcënimet që, sipas saj, i ka bërë autori i vrasjes së viktimës. Ajo ka vënë në dukje se ky nuk është rasti i parë kur persona keqdashës tentojnë të abuzojnë me mbiemrin Haradinaj për të frikësuar qytetarët, duke e shfrytëzuar atë si mburojë për sjelljet e tyre të paligjshme. Duke shtuar se këtë mbiemër e mbajnë ajo vetë, fëmijët e saj, si dhe qindra familjarë të tjerë, ajo ka këmbëngulur që të shmanget çdo paqartësi ose keqkuptim rreth personit për të cilin ka folur avokatja. “Ky është një mbiemër që përfaqëson sakrificën dhe dashurinë për atdhe, respektin ndaj shtetit dhe ligjit, e jo strehë horrash e kriminelësh”, ka theksuar ajo në reagimin e saj. Në mbyllje të prononcimit, Mucaj-Haradinaj ka përsëritur thirrjen që drejtësia të veprojë me efikasitet dhe përgjegjësi, duke siguruar ndëshkimin maksimal për autorin e këtij krimi të rëndë që i mori jetën Arlinda Zekajt.