“A duhet të më vrasë që ta arrestoni?”: Paralajmërimi tragjik i Arlinda Zekajt para se t’i merrej jeta

Pak kohë para se të binte viktimë e një krimi të rëndë, Arlinda Zekaj i ishte drejtuar strukturave policore me një pyetje therëse, e cila sot lexohet si një kushtrim tragjik dhe një dëshmi e qartë e dështimit institucional për të mbrojtur një grua. “A duhet me më vra mua Jetoni, që ju policia atëherë ta arrestoni atë?”, kishte pyetur ajo efektivët e rendit, sipas dokumenteve zyrtare të organeve të ndjekjes që mbajnë datën 25 tetor 2026. Në orën 17:58 të asaj dite, Arlinda kishte dhënë dëshminë e saj të fundit para autoriteteve. Ajo kishte rrëfyer se si, pas një konflikti brenda mureve të shtëpisë, ish-bashkëshorti i saj, Jeton Sylaj, e kishte fyer, kërcënuar dhe kishte nxjerrë jashtë rrobat e saj në oborr. “Pasi unë kam dalë nga banjo dhe e kam pritur lavatriqen që t'i përfundojë rrobat e anëtarëve të Jetonit, dhe pasi përfundoi lavatriqja, unë i kam futur rrobat e mija që të pastrohen, e kam lëshuar lavatriqen dhe shkova në kuzhinë për të ngrënë bukë. Vetëm kur e kam dëgjuar Jetonin duke bërtitur me të madhe dhe ka filluar që të më kërcënojë me fjalët: 'Unë të thyej, të mbys, çka lyp ti në shtëpinë ti, ti nuk guxon kështu me vepru, kush je ti', dhe pasi i kishte marrë rrobat e mija dhe i ka gjuajtur në oborrin e shtëpisë, siç edhe e kanë parë policia. Unë menjëherë nga frika e kam thirrur policinë”, kishte deklaruar ajo në dëshminë e saj. Pavarësisht se kishte shprehur hapur pasigurinë për jetën e saj, Arlinda kishte refuzuar të strehohej në ndonjë qendër emergjente. Ajo kishte këmbëngulur se nuk do tërhiqej kurrë nga i biri dhe nga prona e saj e ligjshme. “Nuk e ndi veten të sigurt sa duhet, por nuk heq dorë nga djali dhe pasuria ime. Shteti ka pasur obligim dhe ka për t’i larguar uzurpatorët nga shtëpia ime”, citohet të ketë thënë ajo në raportin e policisë. Megjithatë, tensionet e regjistruara atë ditë përbënin vetëm një pjesë të kalvarit të gjatë të Arlindës, në qendër të të cilit qëndronte djali i ei 12-vjeçar, i cili mban shtetësi amerikane. Sipas dosjes hetimore, pasi fëmija kishte shkuar për një vizitë te xhaxhai i tij, nuk u ishte kthyer më në duart e nënës. Arlinda akuzonte familjarët e ish-bashkëshortit se e kishin mbajtur me forcë djalin, duke ia pamundësuar kontaktin me të. Ky rast ishte denoncuar në polici më 10 korrik 2026 dhe ishte regjistruar zyrtarisht me numrin e referencës 2026-DA-853. Më 13 korrik, Arlinda ishte marrë sërish në pyetje, ndërsa një ditë më vonë autoritetet kishin intervistuar Jeton Sylajn dhe të miturin, i cili kishte deklaruar paraprakisht se dëshironte të qëndronte me familjen e babait të tij. Megjithatë, hetimet kishin nxjerrë në dritë një tjetër zhvillim: vetë i ati e kishte braktisur të miturin, duke udhëtuar drejt Shteteve të Bashkuara të Amerikës më 5 shtator 2026 dhe duke ua lënë kujdestarinë e djalit palëve të treta. Në rrethana të tilla, Gjykata Themelore në Pejë kishte marrë vendim më 16 shtator që fëmija t'i kthehej përfundimisht kujdestarisë së nënës. Krahas kësaj, gjykata kishte caktuar detyrimin për pagesën e alimentacionit dhe kishte vendosur një urdhër mbrojtës për të ndaluar çdo afrim të Jeton Sylajt ndaj Arlindës. “Jeton Sylajt i ndalohet t’i afrohet palës së mbrojtur, Arlinda Zekaj, në distancë prej 2 metrash në shtëpinë ku aktualisht qëndron pala e mbrojtur, si dhe në distancë prej 20 metrash në rrugë, qytet, fshat apo në vendin e saj të punës. Gjithashtu, i ndalohet të ushtrojë dhunë fizike ose psikike, t’ia bllokojë lëvizjen viktimës, ta ofendojë, ta shqetësojë apo ta kërcënojë palën e mbrojtur”, thuhej në aktvendim. Përveç këtij materiali voluminoz hetimor të datës 16 tetor 2026, dosja përfshinte edhe vendime të tjera të drejtësisë të datave 23 dhe 25 tetor, përmes të cilave Arlinda i bënte thirrje urgjente shtetit që të zbatohej vendimi për ribashkimin e saj me të birin.