Tragjedia e Arlindës, Nagavci kërkon drejtësi dhe përgjegjësi të plotë institucionale

Shefja e Grupit Parlamentar të Lëvizjes Vetëvendosje, Arbërie Nagavci, e ka cilësuar vrasjen e Arlindës si një ngjarje tronditëse që kërkon domosdoshmërisht drejtësi, si dhe vendosmëri për llogaridhënie nga ana e institucioneve. Gjatë prononcimit të saj, ajo bëri të ditur se grupi parlamentar që ajo drejton ka ndërmarrë hapa konkretë duke kërkuar mbajtjen e një seance të jashtëzakonshme parlamentare. Po ashtu, Nagavci njoftoi se tashmë është iniciuar edhe ngritja e një komisioni hetimor të veçantë, i cili do të ketë për detyrë të analizojë në detaj të gjithë zinxhirin e përgjegjësisë institucionale lidhur me këtë rast.