Beteja për Aeroportin e Vlorës, Behgjet Pacolli dëshmon për shtatë orë në SPAK dhe dorëzon provat e reja

Ish-presidenti i Kosovës, Behgjet Pacolli, ka përfunduar dëshminë e tij shtatëorëse në Prokurorinë e Posaçme kundër Korrupsionit dhe Krimit të Organizuar (SPAK), ku ka dorëzuar dokumentacion dhe dëshmi lidhur me zhvillimet rreth Aeroportit Ndërkombëtar të Vlorës. Në një reagim të bërë publik në rrjetet sociale, Pacolli ka ndarë detaje nga kjo vizitë në organin e akuzës, duke theksuar se ka ekspozuar të gjitha elementët e situatës që rrethon këtë infrastrukturë të rëndësishme. “Sot pata mundësinë të paraqitesha për rreth 7 orë para Prokurorisë së Posaçme kundër Korrupsionit dhe Krimit të Organizuar (SPAK), ku paraqita në mënyrë të detajuar faktet, dokumentet dhe rrethanat e asaj që ka ndodhur dhe po ndodh me Aeroportin Ndërkombëtar të Vlorës. E vlerësoj këtë mundësi dhe jam i kënaqur që mundëm të sjellim përpara organit kompetent të vërtetën e plotë mbi ndërhyrjet e paligjshme në strukturën e pronësisë, shpërfilljen e vendimeve gjyqësore dhe cenimin e pronës private”, ka shkruar ai. Gjatë prononcimit të tij, biznesmeni dhe politikani ka shprehur besimin e plotë tek sistemi i drejtësisë në Shqipëri, duke pritur nga institucionet që të veprojnë me pavarësi të plotë për të rivendosur sundimin e ligjit. Në fund, Pacolli ka garantuar se do të vijojë bashkëpunimin e ngushtë me SPAK-un dhe strukturat e tjera shtetërore, derisa kjo çështje të marrë një epilog përfundimtar dhe të mbrohen plotësisht të drejtat e tij ligjore.