Bashkëpunimi dypalësh në fokus: Kurti takon ambasadoren e re të Holandës, Astrid de Vries

Kryeministri i Republikës së Kosovës, Albin Kurti, ka zhvilluar një takim zyrtar me ambasadoren e re të Holandës në vendin tonë, Astrid de Vries, ku u shqyrtuan mundësitë për intensifikimin e partneritetit dypalësh në sektorë kyç. Gjatë këtij takimi, kreu i ekzekutivit kosovar theksoi synimin për të zgjeruar bashkëpunimin me shtetin holandez veçanërisht në sektorin e bujqësisë dhe atë të energjisë së ripërtëritshme. Po ashtu, u vu theksi te nevoja e finalizimit sa më të shpejtë të bisedimeve për marrëveshjen që rregullon transportin ndërkombëtar të mallrave dhe pasagjerëve. Tjetër temë e diskutimit ishin edhe konsultimet politike ndërmjet Kosovës, Holandës, Belgjikës dhe Luksemburgut, me synim forcimin e koordinimit strategjik ndërmjet vendeve. “Në takimin e parë me ambasadoren e re Astrid de Vries, të cilës i urova mirëseardhje në Republikën tonë, biseduam për konsultimet politike ndërmjet Holandës, Belgjikës, Luksemburgut dhe Kosovës, me qëllim rritjen e bashkërendimit strategjik. Sikurse për prioritetet e Qeverisë në mandatin e ri, nga hekurudhat e digat, te reformat në administratë publike, në arsim e në drejtësi”, ka shkruar Kurti.