Zyrtare: Gentjan Mezani merr frenat e Drenicës pas largimit të Jeton Mehmetit

Klubi futbollistik i Drenicës ka zyrtarizuar emërimin e trajnerit të ri, pas largimit të paralajmëruar nga drejtimi i skuadrës të teknikut Jeton Mehmeti. Skuadra kuqezi i ka besuar pankinën strategut të njohur, Gentjan Mezani, i cili tashmë do të udhëheqë shtabin teknik të ekipit. Nëpërmjet një njoftimi zyrtar për opinionin sportiv, drejtuesit e klubit kanë konfirmuar arritjen e marrëveshjes me trajnerin Mezani, duke shprehur besimin se ai është njeriu i duhur për të realizuar synimet e klubit. "FC Drenica njofton opinionin publik se ka arritur marrëveshje me trajnerin Gentjan Mezani, i cili do të jetë në krye të shtabit teknik të skuadrës sonë", thuhet në komunikatën e lëshuar nga klubi. Po ashtu, drejtuesit drenicaqas i kanë shprehur mirëseardhjen teknikut të ri, duke i uruar fat dhe suksese të plota në arritjen e objektivave madhore që ka ekipi për këtë edicion. Gjatë karrierës së tij të pasur, Mezani ka drejtuar skuadrën e Gjilanit në dy periudha të ndryshme, ndërsa eksperiencë të rëndësishme ka krijuar edhe në futbollin shqiptar, ku ka qenë në krye të ekipeve si Flamurtari, Laçi, Luftëtari dhe Bylisi.