Tragjedia në Pejë: Deputeti Berisha kërkon shkarkime urgjente të krerëve të sigurisë dhe drejtësisë

Pas ngjarjes së rëndë të regjistruar në qytetin e Pejës, deputeti i Aleancës, Bekë Berisha, ka lëshuar një thirrje të fortë për llogaridhënie institucionale, duke kërkuar largimin e menjëhershëm nga detyra të gjithë zinxhirit përgjegjës, duke përfshirë ministrin përkatës, drejtorin e Policisë, hetuesit rajonalë në Pejë, si dhe koordinatoren shtetërore. Në një prononcim për mediat, Berisha theksoi se hapi i parë dhe më urgjent duhet të jetë ndëshkimi administrativ përmes shkarkimeve, e më pas kalimi në votimin e rezolutave parlamentare. "E para, jemi të tmerruar dhe të shqetësuar për këtë rast që ka ndodhur. E dyta, mendoj se është dashur të ketë veprime institucionale, menjëherë shkarkime për të gjithë zinxhirin e atyre që kanë pasur punë me këtë rast edhe për koordinatoren shtetërore. Pastaj mund ta votojmë rezolutën. Kjo situatë kërkon siç do ta kishte shkruar ajo me fjalët e veta, që të mos vijë dita të japim llogari pasi të mos jem më unë. E sot ka ardhur ajo ditë. Është dashur të ketë veprime institucionale. Pra, shkarkime dhe përgjegjësi të menjëhershme, nga ministri, drejtori i Policisë, zyrtarët e hetimeve në Pejë dhe gjithkund tjetër ku kanë të bëjnë me këto raste. Pastaj mund ta bëjmë rezolutën dhe të paraqesim kërkesa të tjera. Unë për momentin jam për këtë: është dashur të ketë shkarkime", u shpreh Berisha.