Vrasja në Vitomiricë: Prokuroria e Pejës zbardh hapat e ndërmarrë dhe hedh poshtë pretendimet për neglizhencë

Prokuroria Themelore në Pejë ka dalë me një sqarim zyrtar lidhur me ngjarjen e rëndë të vrasjes së Arlinda Zekajt në fshatin Vitomiricë, duke hedhur dritë mbi veprimet e ndërmarra nga ky institucion drejtësisë për trajtimin e këtij rasti. Gjatë një konference për media, zëdhënësi i Prokurorisë Themelore në Pejë, Shkodran Nikçi, ka paraqitur dinamikën e plotë të ndërhyrjeve institucionale, duke mohuar çdo pretendim për lëshim apo mosveprim në këtë ngjarje tragjike, ndërsa theksoi se më 23 tetor prokuroria kishte ngritur aktakuzë ndaj ish-bashkëshortit për veprën penale të kanosjes në kuadër të dhunës në familje. Sipas Nikçit, pas pranimit të një shkrese nga viktima që ngrinte shqetësime për trajtimin e rasteve nga ana e zyrtarëve, kryeprokurorja ka vepruar menjëherë duke hapur rast në Departamentin për Krime të Rënda dhe ka autorizuar një prokuror për të hetuar çdo pretendim. Ai shtoi se në këtë shkresë gjithashtu kërkohej zbatimi i një vendimi gjyqësor për të drejtën e pronësisë, shfrytëzimit të pronës me ish-bashkëshortin dhe urdhërmbrojtjen që ndalonte afrimin e tij në më pak se dy metra. Nikçi bëri të ditur se më 22 tetor, vendimi u ekzekutua me asistencën e Policisë së Kosovës, mirëpo pak orë më vonë u raportuan mosmarrëveshje brenda shtëpisë. Prokurorja kujdestare ka zhvilluar biseda me viktimën dhe organet e rendit, ku është vlerësuar rrezikshmëria e lartë për jetën e saj, duke i sugjeruar që të largohet përkohësisht nga ajo banesë. Pavarësisht insistimit të autoriteteve dhe thirrjeve nga dy vëllezërit e ftuar nga kryeprokurorja e shtetit për ta bindur që të strehohej tek ata përkohësisht, viktima kishte kundërshtuar në mënyrë kategorike largimin, ndërsa kryeprokurorja kishte kërkuar reagim urgjent nga të gjitha institucionet kompetente. Në përfundim, zëdhënësi Nikçi konfirmoi se nuk ka pasur ndonjë precedent të mëparshëm penal mes viktimës dhe autorit të dyshuar, i cili aktualisht është në arrati. Policia po zhvillon hetime intensive për kapjen e ish-kunatit të dyshuar për vrasje të rëndë, duke kërkuar edhe bashkëpunimin e qytetarëve, teksa prokuroria theksoj se ka vepruar me profesionalizëm dhe urgjencë të plotë.