"Ndal dhunës ndaj grave": Rrjeti i Grave të Kosovës thirrje urgjente për marshim kundër femicidit

Rrjeti i Grave të Kosovës ka bërë thirrje për një mobilizim masiv në marshimin kundër femicidit që do të mbahet sot duke filluar nga ora 12:00, me qëllim që ndalimi i vrasjeve të grave të trajtohet si prioritet dhe urgjencë kombëtare. Nëpërmjet kësaj proteste publike, organizata kërkon ndërmarrjen e hapave konkretë nga ana e institucioneve për të parandaluar dhunën me bazë gjinore, për të garantuar mbrojtje më të madhe për viktimat, si dhe për të kërkuar llogaridhënie për çdo dështim të sistemit. Ndër pikat kryesore të platformës së tyre qëndrojnë ndryshimet e nevojshme në Kodin Penal për trajtimin e duhur të femicidit, themelimi i një mekanizmi të posaçëm "Femicide Watch" për shqyrtimin e rasteve dhe gjetjen e mangësive shtetërore, si dhe sigurimi i buxheteve të qëndrueshme për strehimoret, linjat e ndihmës dhe shërbimet e specializuara. Po ashtu, theksohet nevoja urgjente për miratimin dhe zbatimin e akteve nënligjore, të cilat do të mundësonin funksionimin e plotë të mekanizmave mbrojtës dhe mbështetës për gratë që përballen me dhunën. Nga Rrjeti i Grave të Kosovës vënë në dukje se reagimet dhe ngushëllimet formale pas çdo ngjarjeje tragjike nuk mjaftojnë më, ndaj kërkohet vendosmëri për drejtësi, masa konkrete parandaluese dhe përgjegjësi institucionale.