Tragjedia në Pejë, aktori Shkumbin Istrefi shpërthen ndaj drejtësisë: Viktimat kërkojnë ndihmë, por institucionet heshtin

Ngjarja e rëndë e vrasjes së gruas në qytetin e Pejës ka tronditur thellë opinionin publik në mbarë vendin, duke nxitur valë reagimesh të ashpra nga personalitete të larta shtetërore, si dhe nga komuniteti artistik e kulturor. Mes zërave të shumtë të revoltuar është dalluar ai i aktorit dhe producentit të njohur, Shkumbin Istrefi, i cili ka shprehur indinjatë të thellë ndaj asaj që e ka cilësuar si neglizhencë skandaloze të organeve të drejtësisë. Reagimi i tij publik vjen pas zbardhjes së detajeve se e ndjeri ishte drejtuar vetë te Prokuroria e Pejës më 22 tetor për të kërkuar vendosjen e masave paraprake të sigurisë. “I tmerrshem rasti i vrasjes se Arlinda Zekajt. Viktima e ka paralajmeruar rrezikun per jete ne organet e drejtesise. Nuk po mund ta kuptoj si mund te behen keso leshime. A eshte e mundur qe jemi kaq te papergjegjshem? Shokante. Tmerr. Ndjese paste Arlinda”, ka shkruar ndër të tjera aktori Istrefi. Kjo ngjarje tragjike që ka tronditur mbarë Kosovën ka bërë që një numër i madh figurash publike të ngrenë zërin kundër dështimeve institucionale në mbrojtjen e jetës së qytetarëve. Arlinda Zekaj ndërroi jetë të dielën e 25 tetorit, pasi u sulmua me mjet të mprehtë. Si autor i dyshuar i këtij krimi makabër po kërkohet nga policia kunati i saj, i cili ndodhet ende në arrati. Vlen të theksohet se vetëm dy orë para se të ndodhte tragjedia, e ndjera kishte denoncuar në stacionin policor dhunën në familje të ushtruar nga bashkëshorti i saj, i cili më pas u vu në ndalim policor për 48 orë.